خالدہ نیاز

میرا بھی دل چاہتا ہے کہ سوشل میڈیا استعمال کروں، ٹک ٹاک پر ویڈیوز بناوں لیکن میں ایسا نہیں کرسکتی کیونکہ نہ تو میرے پاس سمارٹ فون ہے اور نہ ہی مجھے تصاویر اور ویڈیوز بنانے کی اجازت ہے۔

یہ کہنا ہے ضلع نوشہرہ سے تعلق رکھنے والی ندا کا جو اس وقت ایف ایس سی پارٹ ٹو کی طالبہ ہے۔ ندا کا کہنا ہے کہ اس کو بھائی نے سختی سے منع کیا ہے کہ موبائل کو ہاتھ بھی نہ لگائے اور اگر اس نے کہیں پہ تصاویر بنائی تو یہ اس کے کالج کا آخری دن ہوگا۔ ندا کا کہنا ہے کہ آجکل جدید ٹیکنالوجی کا دور ہے انکو پڑھائی کے لیے بھی سمارٹ فون کی ضرورت ہوتی ہے لیکن وہ موبائل استعمال نہیں کرسکتی کیونکہ اس کو اس کی اجازت نہیں ہے۔

ندا کا کہنا ہے اس کے علاقے میں لڑکیوں کو سوشل میڈیا استعمال کرنے کی اجازت نہیں ہے کیونکہ اس کی وجہ سے کوئی بھی انکی تصاویر اور باقی مواد کا غلط استعمال کرسکتا ہے اور یوں انکی زندگیوں میں طوفان کھڑا ہوسکتا ہے۔ ندا نے بتایا کہ سوشل میڈیا بذات خود غلط نہیں ہے لیکن لوگوں نے اس کا استعمال غلط کیا ہے جس کی وجہ سے لڑکیوں کے لیے مسائل بن جاتے ہیں اور پھر انکی طرح کئی لڑکیاں پڑھائی کے لیے بھی اس کا استعمال نہیں کرسکتی۔

کہیں کسی نے انکی تصاویر کو ایڈیٹ کرکے غلط استعمال تو نہیں کیا

پشاور سے تعلق رکھنے والی ایک نرس نسرین (فرضی نام) نے بتایا کہ ایک دن وہ بیٹھی فیس بک استعمال کررہی تھی جب اس کو مسینجرپر ایک میسج موصول ہوا۔ جب انہوں نے وہ میسج کھولا تو اس میں لکھا ہوا تھا کہ اس لنک پر کلک کرکے دیکھیں اس میں انکی اور انکے بوائے فرینڈ کی تصاویر اور چیٹ لیک ہوئی ہے۔ نسرین نے کہا کہ میسج دیکھ کر انکے پاوں سے زمین نکل گئی اگرچہ نہ تو انکا کوئی بوائے فرینڈ ہے اور نہ ہی کسی اور کے ساتھ کوئی تعلق لیکن ایک لمحے کو وہ ڈر گئی کہ کہیں کسی نے انکی تصاویر کو ایڈیٹ کرکے غلط استعمال تو نہیں کیا۔

نسرین نے جب اس لنک پر کلک کیا تو وہ نہیں کھل رہا تھا۔ بعد میں انہوں نے وہ لنک اپنی دوست کو بھیجا اور سارا قصہ سنایا۔ جب اپنی دوست کو وہ لنک بھیجا تو اس نے بتایا کہ اس میں کچھ بھی نہیں یہ ایک سپیم ہے۔ نسرین نے کہا کہ اس دن کے بعد سے وہ بہت ڈر گئی تھی اور یوں انہوں نے فیس بک اور مسینجر کا استعمال کرنا ہی چھوڑ دیا کیونکہ وہ اب بہت ڈر گئی ہے۔

خیبرپختونخوا میں خواتین جدید ٹیکنالوجی سے دور کیوں

خیبرپختونخوا میں زیادہ تر خواتین سوشل میڈیا اور جدید ٹیکنالوجی سے دور ہیں اس کی بڑی وجہ یہاں کا کلچر ہے۔ زیادہ تر مرد خواتین کو سوشل میڈیا استعمال کرنے کی اجازت نہیں دیتے اور خواتین کے پاس سمارٹ فونز بھی نہیں ہوتے۔

خیبرپختونخوا میں بہت کم خواتین کے پاس سمارٹ فونز ہوتے ہیں اور سوشل میڈیا تک انکی پہنچ نہیں ہوتی لیکن اگر کسی لڑکی یا خاتون کی کوئی تصویر یا ویڈیو سوشل میڈیا پر شیئر ہوجائے تو اسکی انکو بہت سخت سزائی دی جاتی ہے۔ اکثر اوقات ایسے کیسز میں مرد رشتہ دار خاتون یا لڑکی کو جان سے مار دیتے ہیں۔ رواں سال جنوری میں بھی ضلع چارسدہ میں ایک ایسا واقعہ پیش آیا تھا جب ایک لڑکی کی ویڈیو وائرل ہوئی تو اس کو والد نے جان سے ماردیا۔

چارسدہ میں 18 سالہ لڑکی کی ویڈیو وائرل ہوئی تو والد نے مار دیا

ضلع چارسدہ سے تعلق رکھنے والے صحافی محمد باسط خان نے اس حوالے سے بتایا کہ 18 سالہ لڑکی اسلام آباد میں ایک گھر میں کام کرتی تھی جہاں ایک لڑکے نے اسکی ویڈیو وائرل کی تو والد نے اس کو غیرت کے نام پر قتل کردیا۔ انہوں نے بتایا کہ پاکستان میں خواتین کو اکثر اوقات چھوٹی چھوٹی باتوں پر گھریلو تشدد کا نشانہ بنایا جاتا ہے اور کچھ کیسز میں قتل بھی کردیا جاتا ہے۔

محمد باسط خان نے کہا کہ خیبرپختونخوا میں خواتین کو کئی ایک پابندیوں کا سامنا ہے اور یہ پابندیاں انکے والد، بھائی اور باقی گھر کے مرد لگاتے ہیں جس کی وجہ سے ان میں موجود صلاحیتیں کبھی سامنے نہیں آتی۔ انہوں نے کہا کہ اس جدید دور میں بھی جب ایک عورت گھر سے کام کے لیے نکلتی ہیں تو انکے کام کو معیوب سمجھا جاتا ہے اور لوگ طرح طرح کی باتیں بناتے ہیں جس کی وجہ سے لوگوں کی بھی یہی سوچ ہے کہ خواتین گھر میں بیٹھ کر برتن دھوئیں، کھانا بنائیں اور بچے پالیں۔

محمد باسط خان کے مطابق پاکستان میں اس وقت انیس کروڑ موبائل صارفین موجود ہیں جن میں 5 کروڑ تعداد خواتین کی ہے جبکہ باقی مرد ہیں۔ انٹرنیٹ استعمال کرنے والی خواتین کی تعداد 2 کروڑ ہے جبکہ باقی خواتین انٹرنیٹ استعمال نہیں کرتیں۔ محمد باسط نے بتایا کہ خواتین کو اب سوشل میڈیا پر بھی تنگ کیا جاتا ہے، پہلے تو صرف گلی کوچوں میں انکے پیچھے لوگ آواز کستے تھے لیکن اب تو سوشل میڈیا پر بھی انکو نہیں چھوڑا جاتا۔ اگر کوئی خاتون آن لائن کاروبار کرتی ہیں تو ان کو لوگ آرڈر دے دیتے ہیں اور بعد میں انکار کردیتے ہیں کہ ہم نے یہ چیز نہیں لینی۔ بعض لوگ خواتین کو غیر اخلاقی میسجز بھی بھیجتے ہیں جس کی وجہ سے خواتین خود بھی تنگ آکر سوشل میڈیا کا استعمال کرنا چھوڑ دیتی ہیں۔

خواتین آن لائن ہراسمنٹ کے حوالے سے گھر میں بتا نہیں پاتی

خواتین کا مسئلہ یہ بھی ہے کہ انکو جب آن لائن طور پر ہراساں کیا جاتا ہے تو وہ گھر والوں کو بھی نہیں بتا پاتی کیونکہ یہاں جب خواتین اس حوالے سے بات کرتی ہیں تو ان پر پابندیاں لگائی جاتی ہیں اور یوں بہت ساری خواتین چپ سادھ لیتی ہیں۔

محمد باسط خان نے کہا کہ ہماری خواتین میں بہت ٹیلنٹ موجود ہے جو بہت آگے جاسکتی ہیں لیکن بدقسمتی سے ہمارا معاشرہ اور ہمارا کلچر انکے آڑے آجاتا ہے۔ ایک خاتون کا ذکر کرتے ہوئے انہوں نے کہا کہ ایک خاتون آن لائن بزنس کرتی ہیں، بہت ٹیلنٹڈ ہیں لیکن ان کو گھر والوں نے اس شرط پر اس کی اجازت دی ہے کہ کسٹمر سے وہ بات نہیں کریں گی بلکہ اس کا بھائی یا کوئی اور مرد کرے گا تو اس سے اندازہ لگایا جاسکتا ہے کہ ہم نے خواتین کو کتنا خودمختار بنایا ہے۔ وہ خاتون جو ایک کام میں مہارت رکھتی ہیں کسٹمر کو اچھے سے ڈیل کرسکتی ہیں اور کاروبار کو کامیاب بناسکتی ہیں وہ اس کا بھائی یا کوئی اور نہیں کرسکتا لیکن مسئلہ پھر وہی آجاتا ہے کلچر کا۔

محمد باسط خان نے مزید بتایا کہ کچھ خواتین کو سائبر کرائمز کے حوالے سے قانونی راستوں کا بھی پتہ ہوتا ہے لیکن وہ اول تو کیس نہیں کرتی یا اگر کرتی بھی ہیں تو معاشرتی دباؤ اور گھر والوں کی عزت کی خاطر واپس لے لیتی ہیں۔

کوہستان ویڈیو سکینڈل

چارسدہ کا واقعہ اپنی نوعیت کا پہلا واقعہ نہیں ہے۔ اس سے قبل بھی کئی خواتین اور لڑکیوں کو سوشل میڈیا ویڈیوز کی وجہ سے مسائل کا سامنا کرنا پڑا ہے۔

دو ہزار بارہ میں ضلع کوہستان کے علاقے پالس میں ہونے والی ایک شادی کی ویڈیو وائرل ہوئی تھی جس میں پانچ لڑکیوں کی تالیوں کی تھاپ پر دو لڑکے رقص کررہے تھے۔ بعد ازاں رپورٹس سامنے آئی تھی کہ ویڈیو میں نظر آنے والی پانچوں لڑکیوں کو قتل کردیا گیا ہے۔

اس کے علاوہ رپورٹس کے مطابق دو ہزار چودہ میں بھی لوئر دیر کے علاقے جندول میں بھائی نے اپنی 13 سالہ بہن کواس لیے قتل کردیا تھا کیونکہ وہ موبائل استعمال کرتی تھی اور بھائی کو شک تھا کہ اس کی بہن مردوں سے بات کرتی ہیں۔

پاکستان ٹیلی کمیونکیشن اتھارٹی کے مطابق چار کروڑ ساٹھ لاکھ سوشل میڈیا صارفین میں 78 فیصد مردوں کے مقابلے میں خواتین کی شرح صرف 22 فیصد ہے۔

پاکستان میں ڈیجیٹل گیپ بہت زیادہ ہے

گورنمنٹ کامرس کالج پشاور کی اسسٹنٹ پروفیسر عروج نثار کہتی ہیں کہ آج کا دور جدید ٹیکنالوجی کا ہے اور وہی قومیں ترقی کی راہ پر گامزن ہوسکتی ہیں جو اس ٹیکنالوجی کا صحیح استعمال کریں گی۔ انہوں نے کہا کہ پاکستان میں ڈیجیٹل گیپ بہت زیادہ ہے بہت کم لوگ ہیں جو ڈیجیٹل ٹیکنالوجی سے استفادہ حاصل کررہے ہیں۔

عروج نثار نے کہا کہ زیادہ تر لوگوں کی نہ تو ڈیجیٹل ٹیکنالوجی تک رسائی ہے، نہ ہی انکو اس کا استعمال آتا ہے اور نہ انکو اس کے استعمال کی اجازت ہے۔ انہوں نے کہا کہ پاکستان میں خواتین ڈیجیٹل ٹیکنالوجی سے بہت دور ہیں جس کی بہت ساری وجوہات ہیں۔ ان وجوہات میں ایک یہ بھی ہے کہ اگر خواتین کو ٹیکنالوجی تک رسائی دی جائے گی تو وہ اپنے حقوق سے باخبر ہوجائیں گی اور اپنے فیصلے خود کرنے لگ جائیں گی جبکہ معاشرہ اس چیز سے ڈرتا ہے۔

خیبرپختوںخوا اور قبائلی اضلاع کی خواتین کی ڈیجیٹل ٹیکنالوجی تک رسائی کے حوالے سے عروج نثار نے بتایا کہ ہماری خواتین اس سے کوسوں دور ہیں۔ قبائلی اضلاع میں تو مرد بھی سوشل میڈیا اور ان چیزوں سے دور ہیں لیکن خواتین کے لیے تو وہاں سوشل میڈیا اور ڈیجیٹل ٹیکنالوجی کا تصور بھی نہیں ہے۔ قبائلی اضلاع میں خواتین کے پاس موبائل فونز نہیں ہوتے انکے پاس سادہ فونز ہوتے ہیں جو صرف ضرورت کے لیے ہوتے ہیں انکو سمارٹ فونز رکھنے کی اجازت نہیں ہوتی۔

رائٹ ٹو انفارمیشن بنیادی حقوق میں سے ایک ہے

عروج نثار نے بتایا کہ ہمارے صوبے میں لڑکیوں کے لیے سمارٹ فونز رکھنا معیوب سمجھا جاتا ہے۔ انہوں نے کہا کہ ہر وہ چیز جس سے خواتین معاشی یا سماجی طور پر خودمختار ہوتی ہیں وہ انکے لیے معیوب تصور کی جاتی ہیں۔

عروج نثار نے کہا کہ رائٹ ٹو انفارمیشن بنیادی حقوق میں سے ایک ہے اور ٹیکنالوجی کے ذریعے ہی کوئی انسان ہرقسم کی معلومات حاصل کرسکتا ہے لیکن یہاں خواتین اس بنیادی حق سے محروم ہیں۔ عروج نثار کے مطابق جب تک ہم آدھی آبادی یعنی خواتین کو بنیادی حقوق نہیں دیں گے، جدید ٹیکنالوجی تک رسائی نہیں دیں گے تب تک ہم ایک کامیاب قوم نہیں بن سکتے۔ انہوں نے کہا کہ خواتین کو ڈیجیٹل ٹیکنالوجی تک نہ صرف رسائی دینے کی ضرورت ہے بلکہ انکو اس سلسلے میں ٹریننگز بھی دینی چاہیئے تاکہ وہ اس کا مثبت استعمال کرکے نہ صرف خود معاشی طور پر خودمختار ہو بلکہ ملک و قوم کی ترقی میں بھی اپنا کردار ادا کرسکیں۔

کچھ خواتین خود بھی سوشل میڈیا پرگمنام رہنا چاہتی ہیں

مردان سے تعلق رکھنے والے افتخارخان نے بتایا کہ سوشل میڈیا کا منفی اور مثبت دونوں طریقوں سے استعمال ہورہا ہے اور بدقسمتی سے ہمارے معاشرے میں اس کا منفی استعمال زیادہ ہے۔ انہوں نے کہا کہ یہ بات ٹھیک ہے کہ زیادہ تر گھرانوں میں خواتین کو سوشل میڈیا استعمال کرنے کی اجازت نہیں دی جاتی لیکن دوسری طرف کچھ خواتین خود بھی سوشل میڈیا پر اپنی شناخت چھپانا چاہتی ہیں اور فیس بک پر اکثر خواتین تبدیل نام کے ساتھ آئی ڈی بنادیتی ہیں۔ خواتین اس کو استعمال کرنا چاہتی ہیں، مختلف گانوں، ڈراموں اور باقی پوسٹوں کو شیئر اور لائیک تو کرتی ہیں لیکن وہ چاہتی ہیں کہ جس کمیونٹی میں وہ رہ رہی ہیں وہ انکے حوالے سے زیادہ معلومات نہ رکھیں کہ وہ کیا شیئر کرتی ہیں یا کیا پسند کرتی ہیں کیونکہ انکو معاشرے کے لوگوں کی وجہ سے مشکلات کا سامنا کرنا پڑسکتا ہے۔

افتخارخان نے کہا کہ سوشل میڈیا رابطوں کا سب سے تیز اور آسان ذریعہ ہے اور ہمارے معاشرے کے مرد نہیں چاہتے کہ انکی خواتین کسی کے ساتھ رابطے میں رہیں اس لیے وہ سوشل میڈیا کا استعمال کریں۔ انہوں نے کہا کہ سوشل میڈیا کے ذریعے ہر انسان چاہے وہ مرد ہو یا عورت معلومات تک رسائی حاصل کرسکتا ہے۔ اگر خواتین کو سوشل میڈیا اور ڈیجیٹل ٹیکنالوجی تک رسائی نہیں دی جائے گی تو وہ نہ تو مثبت طریقے سے سوچ سکتی ہیں اور نہ ہی وہ کوئی کاروبار شروع کرسکتی ہیں۔

ماریہ انجم

تمہیں دیکھ کر لگ رہا ہے جیسے تمہیں کسی نے تشدد کا نشانہ بنایا ہے۔’

‘نہیں بابا اس نے مجھے ہاتھ تک نہیں لگایا ‘

تشدد صرف مار پیٹ نہیں ہوتی   ‘

  پاکستان کے نجی ٹی وی پر  نشر ہونے والے ڈرامے کا یہ کلپ ٹک ٹاک اور فیس بک  پر وائرل ہے جہاں ایک  شادی شدہ بیٹی اپنے باپ سے یہ گفتگو کر رہی ہے۔ باپ نے بیٹی کی حالت کو دیکھتے ہوئے اندازہ لگایا کہ اس کا شوہر اس کو تشدد کانشانہ بناتا ہے لیکن بیٹی نے کہا کہ وہ اس کو ہاتھ بھی نہیں لگاتا۔

اس کلپ کے نیچے لکھے جانے والے کمنٹس کا اگر جائزہ لیا جائے تو نوے فیصد خواتین اس ڈرامے کے کلپ میں ہونے والی گفتگو کے متعلق کہتی ہوئی نظر آتی ہیں کہ ان کے ساتھ بھی یہی ہوچکا ہے جہاں ان کے شوہر ان کو ذہنی طور پر اتنا تشدد کا نشانہ بناتے ہیں کہ دیکھنے والے کو اندازہ ہوجاتا ہے کہ وہ کس ذہنی اذیت سے دوچار ہیں۔

پاکستان خواتین کے خلاف تشدد میں انسانی حقوق کی سب سے زیادہ خلاف ورزیاں کرنے والے ممالک میں سے ایک بن چکا ہے۔ جہاں تقریباً 32 فیصد خواتین کو مبینہ طور پر جسمانی تشدد کا سامنا کرنا پڑتا ہے جبکہ 40 فیصد شادی شدہ خواتین ازدواجی تشدد کا شکار ہیں جس میں ذہنی تشدد یا مینٹل ابیوز سر فہرست ہے۔

پاکستان میں جہاں خواتین کو جسمانی تشدد کا نشانہ بنانا ایک عام سی بات سجھا جاتا ہے وہیں معاشرہ اب صنفی بنیادوں پر تشدد کا اتنا عادی ہوچکا ہے کہ اب کیوں؟ یا کیسے؟ کے بجائے یہ پوچھا جاتا ہے کہ عورت نے ایسا کیا کردیا تھا؟

پاکستان میں جہاں خواتین جسمانی تشدد پر بھی صبر کر جا تی ہیں وہاں ذہنی تشدد یا گیس لائٹنگ کے حوالے سے ان کے پاس آگاہی نہ ہونے کے برابر ہے۔ خواتین کے ذہنی امراض کے حوالے سے کام کرنے والی ڈاکٹر ثمینہ منظور کا کہنا ہے کہ ان کے پاس اسی فیصد شادی شدہ  خواتین ڈیپریشن کی شکایات لے کر آتی ہیں اور ان میں سے نوے فیصد خواتین ازداواجی و ذہنی تشدد کا شکار ہوتی ہیں لیکن ان کو خود اس بات کا علم نہیں ہوتا۔

ڈاکٹر ثمینہ منظور کا کہنا ہے کہ ہم تشدد کو اکثر صرف جسمانی  سمجھتے ہیں جہاں ہم نظر آنے والے زخموں ، نیل اور نشانات سے اس کا ایک خاکہ بناتے ہیں لیکن ذہنی تشدد اس سے زیادہ خطرناک ثابت ہوسکتا ہے جہاں آپ کہ پاس دکھانے کے لیے کوئی زخم نہیں ہوتا۔ یہی وجہ ہے کہ ذہنی تشدد کو نظر انداز کرنا آسان ہے۔ ذہنی تشدد میں زبانی بد سلوکی ، شک اور بلاوجہ نظر انداز کرنا جس میں آپ کو اپنا آپ غلط لگے شامل ہے۔ 

گیس لائٹنگ کیا ہے اور اس کی علامات کیا ہوسکتی ہیں؟    

گیس لائٹنگ ذہنی تشدد کی ایک قسم ہے جہاں تشدد کا شکار ہونے والے افراد میں جان بوجھ کر ان کی شخصیت اور خیالات کے حوالے سے شک پیدا کیا جاتا ہے۔ امیریکن سائیکلوجیکل ایسوسییشن کے مطابق کسی شخص کو اس قدر مینیوپلیٹ کر دینا کہ اس کو واقعات ، خیالات اور حتیٰ کہ اپنے  تجربات کے حوالے سے شک ہونے لگ جائے اور وہ اس بات کو مان لیں کہ ان کا پارٹنر جو کہ رہا ہے وہ بالکل ٹھیک ہے۔ گیس لائٹنگ کی شروعات جھوٹ سے ہوتی ہے جو کہ بار بار بولا جاتا ہے اور پکڑے جانے پر اس کو ماننے سے انکار کردیا جاتا ہے۔

حرا رمضان کا تعلق راولپنڈی کے ایک پوش علاقے سے ہے ، ان کی شادی تین سال تک چلی جس کے بعد انہوں نے خلع لے لی۔ حرا رمضان کا کہنا ہے کہ شروع میں مجھے بالکل محسوس نہیں ہوا کہ میں تشدد کا شکار ہورہی ہوں کیونکہ میرے سابق شوہر میرے ساتھ بہت اچھا رویہ رکھ کر مجھ سے وہ باتیں منواتے تھے جو شاید میں اگر خود سے فیصلہ لے سکتی تو کبھی نہ کرتی۔

حرا رمضان کا کہنا ہے کہ وہ بدترین گیس لائٹنگ کا شکار ہوگئی تھیں جہاں ان کے شوہر ان کو بار بار یہ محسوس کرواتے تھے کہ وہ ان سے کم تر ہیں۔ وہ اکثر ان کو کہتے تھے کہ تمہارا یہ لیول نہیں ہے، انہوں نے یہ بات اتنی دفعہ بولی کہ آخر کار انہیں بھی یہ محسوس ہونے لگا کہ شاید واقعی ہی وہ ان کو ڈیزرو نہیں کرتی، وہ اس گھر میں رہنے کے قابل نہیں ہیں اور وہ ان سے بہت کم تر ہیں۔

حرا رمضان کا کہنا ہے کہ میرے لیے یہ قبول کرنا بہت مشکل تھا کہ میرا پارٹنر مجھے ذہنی تشدد کا نشانہ بنا رہا ہے کیونکہ اس وقت مجھے سب صحیح لگ رہا تھا ، میں احساس کمتری کا شکار ہو چکی تھی اس لیے وہ جو بھی کہتے یا کرتے تھے مجھے وہ سب بہت ٹھیک لگتا تھا۔

حرا رمضان کا کہنا ہے کہ وہ ایک پڑھے لکھے گھرانے سے تعلق رکھتی ہیں یہی وجہ ہے کہ ان کے خاندان نے اس ذہنی تشدد کو ایک سنگین مسئلہ سمجھتے ہوئے ان کا بہت ساتھ دیا اور وہ اس ٹاکسک ازدواجی زندگی سے باہر نکلنے میں کامیاب ہوئیں۔

لیکن پاکستان میں ہر جگہ لوگوں کا ذہنی تشدد کے حوالے سے رد عمل ایک جیسا نہیں ہے کیونکہ پسماندہ علاقوں سے تعلق رکھنے والی خواتین کے لیے ایسے ازدواجی تعلقات سے نکلنا انتہائی مشکل ہے، جہاں اگر آپ کا شوہر مار پیٹ نہیں کرتا تو عورت کو صبر کرنا چاہیے کیونکہ تین چار باتیں سن لینے سے اگر گھر بچ سکتا ہے تو گھر کو بچانا ضروری ہے۔

خیبر پختونخوا کے ایک انتہائی پسماندہ علاقے سے تعلق رکھنے والی خاتون انعم خان کا کہنا ہے کہ ان  شوہر اس قدر واقعات کو جھوٹا بنا کر گھر والوں کے سامنے پیش کرتے ہیں کہ اکثر ان کو یہ لگتا ہے کہ واقعی وہ جو کہ رہے ہیں وہ ٹھیک ہے اور میں بہت بری انسان ہوں جو ان کے قابل نہیں ہے ، یہی وجہ ہے کہ ان کو خود سے نفرت ہونے لگ گئی ہے۔

انعم کا کہنا ہے کہ ان کے شوہر کی زبانی بد سلوکی کبھی کبھی اتنی بڑھ جاتی ہے کہ ان کو لگتا ہے کہ وہ ایک انتہائی ناکارہ انسان ہیں اور ان کی کوئی عزت نفس نہیں ہے۔

انعم خان کہتی ہیں کہ وہ دو دفعہ اپنے شوہر کے رویے کی وجہ سے گھر چھوڑ کر گئی ہیں لیکن ان کے والدین کہتے ہیں کہ یہ کوئی وجہ نہیں ہے ، دنیا کی ساری خواتین یہ سب برداشت کرتی ہیں، انعم کہتی ہیں کہ اگر ان کے شوہر مار پیٹ کرتے تو شاید وہ زخموں کے نشان اپنے والدین کو دکھا کر اس شادی کو ختم کرسکتیں۔

گیس لائٹنگ یا ذہنی تشدد کا شکار خواتین کیسا محسوس کرتی ہیں ؟

گیس لائٹنگ یا ذہنی تشدد کی شکار خواتین کے حوالے سے کلینکل سائیکالوجسٹ سعدیہ ناظر کا کہنا ہے کہ ان کے پاس آنے والی خواتین انتہائی سہمی ہوئی ہوتی ہیں،خوف ، بے چینی ، اعتماد کی کمی ، اور ذہنی دباؤ کا شکار ہوتی ہیں یہی وجہ ہے کہ وہ اکثر یہ شکایت کرتی ہیں کہ ان کو سمجھ نہیں آتی اور وہ اپنے بچوں کو بلاوجہ جسمانی تشدد کا نشانہ بناتی ہیں۔

سعدیہ ناظر کا کہنا ہے کہ ایسی خواتین صرف ایک ہی بات پر زور دیتی ہیں کہ وہ بہت کوشش کرتی ہیں کہ سب کو خوش رکھ سکیں لیکن ان سے کوئی خوش نہیں ہوتا۔

سعدیہ ناظر کہتی ہیں کہ گیس لائٹنگ یا ذہنی تشدد کی شکار خواتین میں سب سے عام علامات یہ ہیں کہ وہ خود کا دھیان نہیں رکھتیں ، نہ وہ اچھے کپڑے پہن پاتی ہیں نہ میک اپ کرتی ہیں۔ ایسی خواتین اپنے شوہر کو خوش رکھنے کے لیے ہر ممکن کوشش کرتی ہیں لیکن ان کا کہنا ہے کہ وہ پھر بھی خوش نہیں رہتے، ان کی اپنی کوئی پسند ناپسند نہیں رہتی اور ان کو یہ لگتا ہے کہ وہ اس قابل نہیں ہیں کہ اپنے لیے یا گھر کے لیے کوئی فیصلہ لے سکیں۔

گیس لائٹنگ کی شکار خواتین کو ان کے پارٹنر بار بار اپنے رویے سے یہ بتاتے ہیں کہ وہ اتنی کم تر ہیں کہ ان کی اپنی کوئی حیثیت نہیں ہے۔ ایسی خواتین کو لگتا ہے کہ اگر ان کے شوہر ان کو اپنے گھر میں رکھ رہے ہیں یا خرچہ اٹھا رہے ہیں تو یہ ان کا احسان ہیں ورنہ وہ اس قابل نہیں ہیں۔

سعدیہ ناظر کا کہنا ہے کہ ایک ڈاکٹر ہونے کی حیثیت سے جب ہم ایسی خواتین کو بتاتے ہیں کہ آپ ذہنی تشدد کا شکار ہیں تو پہلے تو وہ ماننے کو تیار ہی نہیں ہوتیں، ان کو یہ قبول کرنے میں بہت وقت لگتا ہے۔ ایسی خواتین کو اس فیز سے نکالنے کے لیے ہم کوشش کرتے ہیں کہ ان کی خود اعتمادی اور عزت نفس کو بحال کیا جائے۔

گیس لائٹنگ یا ذہنی تشدد کی شکار خواتین ایسے ازدواجی تعلقات میں احساس کمتری کا شکار ہوتی ہیں یہی وجہ ہے کہ ان کو مینیوپلیٹ کرنا یا اپنی باتیں منوانا بہت آسان ہوتا ہے۔

خواتین میں گیس لائٹنگ یا ذہنی تشدد کے حوالے سے آگاہی نہ ہونے کے برابر ہے یہی وجہ ہے کہ جب ان کے پارٹنر شروع شروع میں ان کے ساتھ انتہائی اچھا رویہ اپناتے ہیں اور اس کے بعد ان سے اپنی باتیں منواتے ہیں تو وہ اس کو پیار کرنا یا خیال رکھنا تصور کرتی ہیں اور آہستہ آہستہ ان کی اپنی پسند نا پسند ختم ہوجاتی ہے اورحتی کہ ان کی اپنی شخصیت ختم ہو جاتی ہے۔

گیس لائٹنگ یا ذہنی تشدد کو تشدد کیوں نہیں سمجھا جاتا؟

ذہنی تشدد کا کوئی ظاہری زخم یا نشان نہیں ہوتا یہی وجہ ہے کہ اس کو ثابت کرنا انتہائی مشکل ہے۔ سعدیہ ناظر کے مطابق پچانوے فیصد خواتین جو ذہنی تشدد کا شکار ہوتی ہیں ان کو خود ہی معلوم نہیں  ہوتا کہ وہ ذہنی تشدد کا شکار ہیں تو وہ کیسے کسی سے مدد مانگ سکتی ہیں یہی وجہ ہے کہ یہ ایک زیادہ سنگین مسئلہ ہے۔

گیس لائٹنگ کی شکار خواتین ہر وقت ایک الجھن کا شکار ہوتی ہیں یہی وجہ ہے کہ وہ کوئی فیصلہ نہیں لے پاتیں، ایسے ریلیشن شپ سے اس وقت باہر نکلنا بہت مشکل ہوجاتا ہے جب آپ کے ارد گرد لوگ آپ کو صبر کرنے کی تلقین کرتے رہیں۔ معاشرے میں آگاہی نہ ہونے کے باعث ایسی خواتین  کو چپ رہنے ، صبر کرنے اور بچوں کی خاطر گھر بسانے کے مشورے دیے جاتے ہیں۔

ذہنی تشدد ایک انسان کی پوری شخصیت کو تبدیل کردیتا ہے، ایسی خواتین آہستہ آہستہ اپنی عزت نفس کو پاوں تلے روندتے ہوئے اپنے پارٹنر کی خواہشات ، پسند نا پسند کو ترجیح دیتی ہیں۔ ذہنی تشدد یا گیس لائٹنگ کے حوالے سے معاشرے میں آگاہی نہیں ہے یہی وجہ ہے کہ ذہنی تشدد کو ریاستی سطح پر تشدد تسلیم کرنے اور اس کےحوالے سے بھی قانون سازی کی ضرورت ہے، حکومتی اداروں کی جانب سے صنفی بنیادوں پر تشدد کے حوالے سے کی جانے والی آگاہی مہم میں ذہنی تشدد کو شامل کرنا وقت کی اہم ضرورت ہے۔

عاصمہ کنڈی

رات کے گھپ اندھیرے میں  گھر سے نکلتے ہوئے جہاں میرا دل وسوسوں میں گھرا ہوا تھا وہیں ہمایوں کے اندر چھپی حمنہ کی آزادی کی خوشی بھی تھی، اب کوئی حمنہ کو لڑکیوں والے کپڑے زیب تن کرنے، مٹک مٹک کر چلنے اور بات کرنے پر ذہنی اور جسمانی تشدد کا نشانہ نہیں بنائے گا اور اگر اسے کچھ سہنا بھی پڑے گا تو کم از کم وہ اپنوں کے ہاتھوں نہیں ہو گا۔

خواجہ سراء پیدا ہونا میرا قصور نہیں تھا اور مجھے اپنوں کے ہاتھوں اس وقت سے اس بات کی سزا مل رہی تھی جب میں نے ہوش سمبھالا یا شاید اس سے بھی بہت پہلے سے، پر تب کا مجھے یاد نہیں۔

مجھے احساس بھی نہیں تھا کہ میرے والدین مجھے مہمانوں کے سامنے آنے سے کیوں روکتے ہیں اور اگر نادانستگی سے سامنے آ بھی جاؤں تو کسی کی ہنستی، مذاق اڑاتی اور کسی کی ترس کھاتی نظریں مجھے اس وقت تک اپنے حصار میں لئے رکھتیں جب تک مجھے منظر سے ہٹا نہ دیا جاتا۔ مہمانوں کے جانے کے بعد پٹائی اور ڈانٹ الگ حصے میں آتی۔میں گھنٹوں اپنے پر آسائش کمرے کے مرمریں بستر پر لیٹ کے اپنے تکیے کو آنسووں سے بھگوتا رہتا اور ان سب رویوں کے جواز ڈھونڈتا اور کبھی اللہ سے شکوے بر ہو جاتا، مگر کوئی کبھی مجھے دلاسا دینے یا چپ کرانے نہیں آتا تھا۔

آپ سوچ رہے ہوں گے کہ آج ایسا کیا ہو گیا کہ میں اپنا گھر، جو ہر کسی کی محفوظ پناہ گاہ ہوتی ہے، چھوڑنے پر مجبور تھی، ہاں 'تھی' کیونکہ اس گھر سے نکلنے کے بعد، جو کبھی میرے لئے پناہ گاہ نہ بن سکی، کوئی مجھے مجبور نہیں کر سکتا کہ میں گفتگو میں اپنے لئے 'تھا' استعمال کروں ۔ آج سے میں حمنہ ہوں اور اپنے والدین کے ہمایوں کو جسے وہ کبھی نہ اپنا سکے اور نہ تحفظ دے سکے انہی کے گھر چھوڑ کر جا رہی ہوں۔

 خوف اور خوشی کے ملے جلے جزبات میں گم میں بس سٹیشن پہنچ گئی جہاں مجھے اسلام آباد سے لاہور والی بس لینی تھی جو مجھے میری منزل مقصود تک پہنچانے والی تھی۔ سوشل میڈیا کی مدد سے میں نے پہلے ہی لاہور میں مقیم اپنے جیسے گروہ کا پتہ لگا لیا تھا جو کہ ہم جیسے زمانے کے دھتکارے ہوئے اور اپنوں پر بوجھ بنے انسانوں کو کھلے دل اور بانہوں سے خوش آمدید کہتے ہیں ۔

لاہور سٹیشن پر بس سے اتر کر میں نے ایک رکشہ لیا اور اپنے ہاتھ میں کس کے پکڑے ہوئے پتے کی تلاش میں نکلی تو گھر سے باہر کی دنیا نے مجھے پہلا سبق دیا، جب رکشہ ڈرائیور نے صبح کے ویرانے کا فائدہ اٹھاتے ہوئے رکشہ ایک ویران جگہ پر روک دیا اور بھوکے بھیڑئیے کی طرح اپنی پسندیدہ خوراک کی طرف لپکا۔ مجھے اس کی نیت جاننے میں ذرا دیر نہیں لگی کیونکہ ایسے کہیں بھوکے بھیڑئیے میں اپنے خاندان اور جاننے والوں میں بھگت چکی تھی۔

میں اس کی نیت بھانپتے ہی برق رفتاری سے اپنی عزت بچاتے ہوئے دوڑی، وہ عزت جو پہلے بھی کئی بار تار تار ہو چکی تھی مگر میں تو خواجہ سراء ہوں اور ہم جیسوں کی تو شاید عزت نہیں ہوتی۔ انہی سوچوں کے تانوں بانوں میں الجھی میں دوڑتی جا رہی تھی اور پتہ ہی نہ لگا کہ ڈرائیور کہاں رہ گیا پر جب میرے حواس بحال ہوئے تو دیکھا کہ جسم کے کئی حصوں سے خون رس رہا تھا جو شاید جا بجا گرنے پر لگنے والے زخموں کی وجہ سے تھا۔ میں نے تھک ہار کر اپنے دوستوں کو فون کیا اور وہ کچھ دیر میں مجھے لینے کے لئے میرے سامنے موجود تھے۔

جب آنکھ کھلی تو پتہ چلا کہ دن ڈھل چکا تھا اور اگلی رات اپنے پر پھیلانے کو تیار کھڑی تھی۔ میرے ہوش میں آتے ہی ایک درد کی ٹیس نے میرے وجود کا طواف کیا مگر یہ دیکھ کہ سکون بھی محسوس ہوا کہ وہاں موجود سب ہی میرے بارے میں فکرمند تھے اور اچانک ان کے چہروں پر ایک خوشی نمودار ہوئی۔ اماں سکینہ جو یہاں کی گرو تھیں انھوں نے میرا چہرہ اپنے ہاتھوں میں لے کر ماتھے پر بوسہ دیا اور کئی عرصے سے بندھے ضبط کے سب ہی بند ٹوٹ گئے اور آنسو میرے گالوں کو بھگوتے اماں کے دوپٹے میں جذب ہوتے گئے۔

اماں نے کھانے اور دوائیوں کے بعد مجھ سے پوچھا کہ کپڑوں، حلیے اور مہنگے فون سے تو تم کسی امیر گھر کی لگتی ہو، پھر اس حال میں کیسے؟ ان کی آنکھوں میں حیرت میں ڈوبے سوال اس لئے تھے کہ ان کو لگتا تھا کہ خواجہ سراء ہونا صرف غریب گھرانوں میں گناہ سمجھا جاتا ہے۔ میرے جوابوں اور آپ بیتی نے ان کے بہت سے وہم دور کر دیئے، گھر چاہے امیر کا ہو خواجہ سراء اولاد کے لئے ان کے دل بہت غریب ہوتے ہیں۔ ان امیروں کے اونچے اونچے محل نما گھروں میں بھی ہم جیسوں کو ذہنی اذیت اور جسمانی تشدد برداشت کرنا پڑتا ہے اور نام نہاد شریف رشتےدار موقع پاتے ہی ہمیں مال مفت کی طرح لوٹتے ہیں اور ہر بار شکایت پر ہمارے اپنے والدین ہمیں ہی ہونٹوں کو سینے کا سبق دوہراتے ہیں۔

آج اماں کی گود میں سر رکھ کے بہت سکوں مل رہا تھا اور دل کے تہہ خانوں میں سالوں سے بند پڑی ساری باتیں اور شکوے ایک ایک کر کے زبان پر آرہے تھے۔ میں نے کہا اماں میں سکول اور گھر میں محفوظ نہ تھی، یہ معاشرہ ہمیں قبول نہیں کرتا کیونکہ ہمارے اپنے والدین معاشرے کے سامنے ہماری ڈھال نہیں بنتے۔اگر وہ ہمیں قبول کریں اور عزت دیں تو ہم بھی پڑھ لکھ کر معاشرے کی کرداد سازی میں اپنا کردار ادا کر سکتے ہیں۔ اماں نے میری کسی بات کا جواب نہ دیا بس مجھے سنتی رہیں اور پیار سے میرے بال سہلاتی رہیں، مجھے پتہ ہی نہ چلا کہ میں کب سکون کی نیند کی گہری وادیوں میں نکل گئی۔

کچھ دنوں میں طبیعت کافی سنبھل چکی تھی تو میں نے بھی اماں سے اپنے لئے کام ڈھونڈنے کا کہا اور وہ بولی کہ تم تو بارہ جماعتیں پاس ہو، ہم تو ناچ گانے اور سیکس کا کام کر کے اپنا پیٹ پالتے ہیں۔ میں نے کہا کہ میں بھی ناچ گانا کر لوں گی اور ساتھ ساتھ اپنی پڑھائی بھی مکمل کروں گی۔

یوں دن گزرتے گئے اور میں کام کے ساتھ ساتھ پرائیویٹ اپنی گریجوئیشن کی تعلیم بھی مکمل کرتی رہی۔ محفلوں میں ناچ گانے کے دوران ایک دو بار میرا جسمانی استحصال کیا گیا جس سے میں وقتی طور پر ٹوٹی ضرور مگر اپنے آپ کو سنبھالنے کے سوا میرے پاس کوئی چارہ نہ تھا۔ پھر ایک دن میں نے فیصلہ کیا کہ میں بھی سیکس ورک کروں گی، عزت تو یوں بھی محفوظ نہیں تو چلو اپنی مرضی سے جسم فروشی کر لیتی ہوں جس سے چار پیسے ہاتھ آ جائیں گے اور تکلیف بھی کم ہو گی۔

زندگی کا پہیہ چلتا رہا اور میں نے اپنا ماسٹرز مکمل کر لیا۔ اپنی تعلیم کے دوران میں نے کچھ پیسے جوڑ کر ایک لیپ ٹاپ لے لیا تھا اور سوشل میڈیا پر اپنے جیسوں کے لئے آواز اٹھانا شروع کی۔ اندازہ تو مجھے تھا کہ یہ اتنا آسان نہ ہو گا مگر یہ بھی ایک خار بھری راہ ہو گی جس پر روز نہ صرف میرے پاؤں بلکے روح بھی گھائل ہو گی، مگر میں ہمت نہیں ہار سکتی تھی کیونکہ یہ میرے ساتھ میرے جیسے اور بہت لوگوں کی جنگ تھی۔

سوشل میڈیا پہ لوگ میری پوسٹ پر گندے گندے تبصرے کرتے، کوئی گندہ خون کہتا تو کوئی گناہوں کی پوٹلی۔ مجھے بظاہر پڑھے لکھے لوگوں کی سوچ جان کے حیرت ہوتی کہ خواجہ سراء کا تصور ناچ گانے، بھیک مانگنے یا سیکس ورک سے آگے کسی کے ذہن میں نہیں تھا۔ لوگ مجھے کہتے کہ گاہک ڈھونڈے کا نیا طریقہ ہے اب آنلائن بھی آگئی ہو۔ ایک اسد نامی شخص نے مجھے ہراساں کرنا شروع کر دیا اور مجھے پیغامات سے بڑھ کر فون کالز کرنے لگا اور پھر میرے گھر تک آپہچا۔ الحمداللہ مجھے اپنے تحفظ کے سب قوانین کا پتہ تھا میں نے ایف آئی اے میں پیکا قانون کے تحت آنلائن ہراسگی کی شکایت درج کرائی۔ پہلے تو وہاں موجود افسران کی حیرت ختم ہونے میں نہیں آرہی تھی کی ایک خواجہ سراء بھی آنلائن ہراساں ہو سکتا ہے، بحرحال انھوں نے نہ صرف شکایت درج کی بلکہ کچھ دن میں مجرم بھی سلاخوں کے پیچھے تھا۔

اس سارے مرحلے نے میرے اندر ایک نئی جان ڈال دی اپنے اور اپنے جیسوں کے حق کے لئے لڑنے کی۔ کسی نے خوب کہا ہے کہ ہر واقعہ آپ کو ایک نیا سبق دے جاتا ہے اور خوش قسمتی سے اس بار ایک مثبت سبق ملا تھا جس نے آگے کے تاریک راستے میں کئی مشعلیں روشن کر دیں تھیں، اور مجھے میری منزل صاف نظر آرہی تھی۔

میری زندگی ناچ گانے، سوشل میڈیا مہم اور نوکری کی تلاش میں گزر رہی تھی۔ نوکری کے انٹرویوز میں حقارت کا نشانہ بننا اور ہراساں کیا جانا عام بات تھی۔ دن گزر رہے تھے شام کو اماں کے اردگرد بیٹھ کے ہم سب دن بھر کے اچھے اور برے پلوں کی روداد سناتے کسی کی بات پہ ہنستے اور کسی کی گزری پر بے اختیار آنکھوں سے آنسو نکل پڑتے۔ مگر اب یہ گھر مجھے گھر لگتا تھا، جہاں اماں کے لئے ہم سب ایک جیسے تھے اور وہ سب میں اپنا پیار برابر بانٹتی تھیں۔

کچھ روز سے میری طبیعت کچھ ناساز سی تھی اور ڈاکٹر کو دیکھانے پر پتہ چلا کہ مجھے ایچ آئی وی ایڈز تھا۔ اس دن میں بہت دل برداشتہ تھی، مرنے کا ڈر نہیں تھا مگر ابھی میں نے اپنے طبقے کے لئے بہت کچھ کرنا تھا۔

علاج کی غرض سے اسلام آباد آنا ہوا۔ اس شہر میں قدم رکھتے ہی پرانی یادوں نے میرے قدم جکڑ لئیے۔سرکاری ہسپتال پمز جہاں وزارت صحت ایڈز کے مریضوں کو مفت علاج فراہم کرتی تھی میں بھی کچھ مزید ٹیسٹوں کے لئے داخل ہو گئی۔ رات ہسپتال کے سفید بستر پر مریضوں کا مخصوص لباس پہنے دل و دماغ اپنے گھر پہنچ گئے۔ کیونکہ شاید آج اپنی ماں جس کی کوکھ سے میں نے جنم لیا بہت یاد آرہی تھی، سوچ رہی تھی گھر چھوڑے پانچ برس بیت گئے، فون نمبر بھی وہی ہے کبھی انھوں نے مجھ سے رابطہ کرنے کی کوشش نہیں کی۔کیا میں ان کو زرا بھی  پیاری نہیں تھی؟

جب سوشل میڈیا پہ میں نے اپنی بیماری کا بتایا تو لوگوں نے کہا کہ گناہوں کی سزا ہے۔ میں ان سے پوچھنا چاہتی ہوں کہ یہ فیصلہ آیا کسی ٹیسٹ سے ہوسکتا ہے کہ ایڈز مجھے پیسے کمانے کے لئے کئے گئے سیکس سے ہوا ہے یا متعدد بار میرا ریپ کرنے سے؟ سیکس ورک کی طرف بھی تو مجھے معاشرے نے ہی دھکیلا تھا ناں۔ کون اپنی مرضی سے اپنا جسم بھیڑیوں کے حوالے کرتا ہے؟

آج میں علاج کروا رہی ہوں اور روز بروز بہتر محسوس کر ہی ہوں۔خوش قسمتی سے ایک ایڈز پر کام کرنے والی بین الاقوامی تنظیم نے مجھے بطور پروگرام مینیجر روزگار دیا اور میں اپنی کمیونٹی میں ایڈز کے بارے میں آگاہی پھیلانے کا کام کرتی ہوں۔ ایک روز آگاہی سیشن کے دوران جب میں نے کہا کہ جب کوئی سیکس ورک کے دوران پروٹیکشن کے استعمال سے منع کرے تو تم لوگ سیکس ورک سے انکار کرو۔ جواب ملا کہ وہ زبردستی کرتے ہیں اور مار پیٹ الگ۔ میں نے کہا کہ پولیس میں جا کہ اپنے ساتھ ہونے والےصنفی تشدد کے خلاف رپورٹ کرواؤ، پھر چاہے یہ تشدد معاشرہ کرے یا اپنے گھر والے۔

۱۸ سالہ شہزادی جو بہت حیرت سے میری باتیں سن رہی تھی، اچانک ہاتھ کھڑا کیا اور کچھ پوچھنے کی اجازت چاہی۔ اجازت ملنے پر بولی کہ صنفی تشدد تو عورتوں پر ہونے والے ظلم کو کہتے ہیں ناں؟ میں نے کہا یہ سوچ ہی غلط ہے اور علم کی کمی ہے۔ جب ہمیں اپنے تحفظ کے قوانین کا پتہ نہیں ہو گا تو ہم اپنے لئے کیسے لڑ سکتے ہیں۔ اب یہ یاد رکھنا اور باقی دوستوں کو بھی بتانا کہ صنفی تشدد کسی بھی جنس کے خلاف ہو سکتا ہے ہم بھی اس میں شامل ہیں۔ اور ہاں ایک بات اور کہ صنفی تشدد میں صرف مار پیٹ یا جسمانی ظلم نہیں ہوتا بلکے آنلائن ہراسگی، پیچھا کرنا، فون پہ تنگ کرنا یا دھمکیاں دینا، سیٹیاں بجانا، دست و درازی کرنا یہ سب بھی صنفی تشدد میں آتا ہے۔

اور یاد رکھنا کہ پاکستان کا آئین، آرٹیکل 25 (2) واضح طور پر کہتا ہے کہ کسی بھی شخص کے ساتھ صرف اس کی جنس کی بنیاد پر امتیازی سلوک نہیں کیا جانا چاہیے۔بل برائے گھریلو تشدد (روک تھام اور تحفظ) ایکٹ 2020 کا مقصد خواتین، بچوں، بزرگوں اور گھریلو تشدد کے خلاف کسی بھی کمزور افراد کے تحفظ، امداد اور بحالی کے ایک موثر نظام کو یقینی بنانا ہے۔ پیکا کا قانون ہمیں بھی برابری کی سطح پر آنلائن تحفظ فراہم کرتا ہے۔

اپنے کام کی وجہ سے مجھے بہت سے قومی اور بین الاقوامی ایوارڈ سے نوازا گیا اور میں نہ صرف اپنی پہچان بنانےمیں کامیاب ہوئی بلکہ اپنی کمیونیٹی کو درپیش مسائل بھی ہر پلیٹ فارم پر اجاگر کرتی ہوں۔ یہ سب مجھے تعلیم نے دیا ہے، اس لئے میں اپنے طبقے کی تعلیم پر بھی کام کر رہی ہوں۔ میں اب بڑے گھر میں شفٹ ہو گئی ہوں پر اماں سکینہ آج بھی میرے ساتھ ہیں۔ اب وہ کوئی کام نہیں کر سکتیں مگر میرے گھر میں ان کی وجہ سے رونق اور برکت رہتی ہے۔

میرے گھر والوں کو بھی میری یاد آگئی جب میں معاشرے میں اپنا مقام بنانے میں کامیاب ہو گئ۔ اب مجھے ان کے سہارے کی ضرورت نہیں ہے مگر میں نے ان کو معاف کر دیا ہر اس زخم کے لئے جس کے داغ آج بھی میری روح پہ نمایاں ہیں۔ میں ان سے ملنے بھی چلی جاتی ہوں اور حیرت کی بات پتہ ہے کیا ہے کہ اب ان کو نہ میرے زنانہ لباس پر اعتراض ہے اور نہ میری چال ڈھال پہ۔ بلکے اب تو وہ مجھے اپنے رشتے داروں سے خود ملواتے ہیں۔

 ایڈز کا علاج جاری ہے اور معاشرے میں اپنے ساتھیوں کی جگہ بنانے کی میری جنگ بھی۔۔۔۔

صباحت خان

         پاکستان کی معاشی، معاشرتی اور سماجی  ترقی میں خواتین کی بڑھتی ہوئی نمائیندگی ہر شعبے میں نمایاں نظر آتی ہیں مگر اس ترقی کی راہ میں اپنے کردار کی ذمیداریاں ادا کرتے ہوئے خواتین مشکلات کا شکار بھی ہیں ۔ خاص کر وہ خواتین جو ملازمت پیشہ یا کاروباری سرگرمیوں کے تحت معاشی استحکام کی کوشش بھی کر رہی ہیں ۔ صنفی بنیادوں پر اجرتوں میں تفاوت کا سامنا ہر تنخواہ دار طبقے سے تعلق رکھنے والی خاتون  کرتی نطر آتی ہیں ۔ عالمی ادارہِ آئی ایل او کے مطابق  دنیا بھر میں خواتین  کو مردوں کی نسبت اوسطاً 20 فیصد کم اجرت ملتی ہے۔ صنفی بنیادوں پر اجرتوں میں فرق کسی حد تک تعلیم، کام کے اوقات، پیشہ ورانہ تفریق، صلاحیتوں یا تجربے جیسی انفرادی خصوصیات کے باعث روا رکھا جاتا ہے تاہم آئی ایل او کے مطابق فرد کے صنف یا جنس کی بنیاد پر امتیازی سلوک اس مسئلے کی بڑی وجہ ہے۔ ورلڈ اکنامک فورم کی سالانہ ’گلوبل جینڈر گیپ رپورٹ 2018‘‘ میں پاکستان کو 149 ملکوں کی فہرست میں 148 نمبر پر رکھا گیا۔.

         حالات و واقعات کا جائز لیا جائے تو یہ بات ثابت ہوتی ہے کہ خواتین کو ملازمت کی جگہوں پر اجرت کی ادائیگی کے لیے  صنفی بنیادوں پر تفریق  کا سامنا کرنا پڑتا ہے۔

      پاکستان میں خواتین کا معاشی سرگرمیوں میں حصہ مردوں کے مقابلے  اچھا خاصا ہے، لیکن چونکہ اکثریتی سطح پر یا تو یہ کام بلامعاوضہ ہیں یا اپنے گھر اور خاندان کے ساتھ مدد کے زمرے میں شامل ہوتے ہیں، تو اس کا نقصان یہ ہے کہ آج بھی خواتین کا معاشی کردار اور حصہ حکومتی اعدادوشمار میں دکھائی نہیں دیتا۔ بہت واصخ طور پر ملک کے سرکاری اور غیر سرکاری اداروں میں خواتین کے ساتھ صنفی بنیادوں پر اجرت میں   تفریق کی جاتی ہے۔

     بشریٰ ملازمت کرتی ہے لاکھوں میں کھیلتی ہو گی۔یہ وہ جملہ ہے جو ہر ملازمت کرنے والی خاتون کے کانوں میں گونجتا ہو گا۔ بشری بھٹی افسوس کا اظہار کرتے ہوئے کہتی ہیں کہ  مجھے یقین نہیں آتا کہ خواتین کے خلاف گھروں سے لے کر دفتروں کے اندر تک معاشی، سماجی اور معاشرتی تشدد کرنے کا کوئی موقع ہاتھ سے جانے نہیں دیا جاتا ہے۔ پانچ سال سے ٖ نجی اکیڈمی میں پڑھاتی ہوں ۔ میل ٹیچرز کے مقابلے میں زیادہ توجہ سے اور دیر تک بچوں کو پڑھتی ہوں  ۔ امتحانوں کے دنوں میں میری محنت، توجہ اور خاصری ڈبل ہو جاتی ہے ۔جس دن تنخواہ ملتی ہے تو میل ٹیچرز اونچی آواز میں بتاتے ہیں کہ فیمیل ٹیچرز سے زیادہ محنت کا پھل ملا ہے۔ انہوں نے کہا کہ ہر جگہ پر خواتین کو پروفیشن کے بجائے صنفی بنیادوں پر ان رویوں کا سامنا کرنا پڑتا ہے۔ بشریٰ مزید کہتی ہیں کہ جب بھی کم تنخواہ کا شکوہ کیا جائے تو میل کولیگز کی جانب سے بولا جاتا ہے کہ خواتین نے کون سے گھر چلانا ہوتا ہے۔خریداری یا کھانے پینے پر ہی پیسہ برباد کرتی ہیں ۔ جبکہ قبر کا حال مردہ جانتا ہے کہ مہنیہ کے آخری دنوں  میں کتنی تنگدستی کا سامنا کرنا پڑتا ہے۔ اداروں کے اندر خواتین کی اجرت کے حوالے سے کوئی پولیسیز نہیں موجود جس کا فائدہ اٹھاکر خواتین کو صنفی تفریق سے دوچار کیا جاتا ہے۔

اسلام آباد کی رہائشی عائشہ ملک اسلام آباد کی ایک ملٹی نیشنل کمپنی میں کمیونیکیشن آفیسر کے طور ملازمت  کر رہی ہیں ۔ عائشہ کا کہنا ہے کہ مردوں کے مقابلے میں خواتین کی تعداد انتہائی کم ہے، آٹھ گھنٹوں سے زیادہ خواتین کام کرتی ہیں بلکہ اکثر مرد کولیگ آفس سے جلدی جانے کے لیے اپنا کام خواتین کولیگز کو سونپ دیتے ہیں ۔زیادہ تر مرد کولیگز اعلیٰ عہدوں پر فائز ہونے کا بھر پور فائدہ اٹھاتے ہیں جس کی وجہ سے خواتین احترام کی وجہ سے مردوں کاکام کرنے سے انکار نہیں کرتی ہیں ۔ اگر بات کی جائے اجرت کے حوالے سے تو ایک ماہ کی  خواتین کی تنخواہیں آفس میں مرد کولیگز کے مقابلے میں کم ہیں ۔پروموشن اینڈ بونس کے اوقات میں بھی خواتین کی صنفی تفریق واضح نظر آتی ہے۔ خواتین کی جانب سے  کئی دفعہ ایگزیکٹو لیول پر بات کرنے کی کوشش کی گئی مگر ہمیشہ ٹال مٹول سے کام لیا گیا ۔ہماری جانب سے زیادہ دوبائو نہیں دیا جاتا کیوں کہ ہمیں بھی نوکری سے ہاتھ دھونے کا ڈر رہتا ہے ۔ انہوں نے کہا کہ تنخواہوں کے مسئلے پر کام کرنے والی خواتین آواز اٹھاتی ہیں تو روزگاہ سے ہاتھ دھونے  کے ساتھ ساتھ دوسرے اداروں میں بھی منفی تاثر قائم ہو سکتا ہےجس سے دوسری جگہ ملازمت حاصل کرنے میں مشکل پیش آسکتی ہے۔

راولپنڈی کی رہائشی سندس عامر ایک سال سے اپنے گھر سے بریانی اور کبابوں کی آن اینڈ آف لائن ڈیلوری کا کاروبار کر رہی ہیں ۔ سندس کا کہنا ہے کہ کاروبار کے آغاز میں اپنی محنت کے حساب سے پرائیس لگائی تھی مگر فروخت نہ ہونے کے برابر تھی جس کے بعد دو ڈشز پر مبنی کاروبار کم پرائیس پر کر رہی ہوں ۔ کاروبارکے لیے  آغاز سے رہنمائی ایک میل کی مدد سے حاصل کی تھی جو مہنگے داموں کھانا فروخت کر نے میں کامیاب ہیں ۔ ان کا کہنا ہے کہ شہر کے اندر مختلف دفتر کے ساتھ گھروں میں دعاوتوں کے لیے  بریانی اور کباب  فروخت کر رہی ہوں ۔ یہ بیان کرتے ہوئے دکھ  ہوتا ہے کہ لوگ آڈر کرنے کے بعد قیمتوں پر بحث کرتے ہیں جس کے نتیجہ میں پرائیس کم کرنی پڑتی ہے ، نہ کرنے کی صورت میں کھانے کا آڈر ختم کر دیا جاتا ہے۔ مردوں کے ساتھ خواتین بھی رقم کم  کرنے پر زور دیتی ہیں کہ کسی برانڈ یا کمپنی کا آرڈر تو نہیں ہے کہ انتی زیادہ پرائیس ہے۔ ایسے رویوں سے میں نے یہ محسوس کیا ہے کہ مردوں کے کاروبار کرنے کو قبولیت حاصل ہے جبکہ صنفی تفریق کا سامنا کاروبار کرنے والی خواتین کے حصہ میں آتا ہے۔

صنفی امور کی ماہر ڈاکٹررخشندہ پروین نے کہا ہے کہ پاکستانی معاشرہ  ثقافتی رسم ورواج میں جکڑا ہواہے جس میں برابری اور مساوات کی مثالیں کم ہی ملتی ہیں۔ خواتین کو صنفی بنیاد پر مسئلوں کا سامنا کرنا پڑتا ہے خاص کر ملازمت پیشہ یا اپنے ہنر کی بنیاد پرمعاشی استحکام کی جدوجہدد کرنے والی خواتین کو اجرت کی ادائیگی مردوں کے مقابلے میں کم ادا کی جاتی ہے۔ مخلتف میڈیا رپورٹز کے مطابق صنفی بنیادوں پر تفریق کی   اوسط شرح چونتیس فیصد سے بھی زیادہ ہو سکتی ہے۔ انہوں نے کہا کہ سرکاری سطح پر خواتین کی اجرت کے حوالے سے برابری کی بنیاد پر ادا کی جاتی  ہیں مگر عملی بنیادوں پر صنفی برابری کا  تصور نہیں ہے۔ جبکہ پرائیویٹ سیکٹرمیں کسی کسی ادارے میں صنفی برابری کے حقوق حاصل ہیں مگر کئی جگہوں پر خواتین کو تنخواہوں کی ادائیگی میں  صنفی تفریق کاسامنا رہتا ہے۔  مجموعی طور پر دیکھا جائے تو خواتین کی شمولیت ورک فورس میں مردوں کے مقابلے میں انتہائی کم ہے اگر اعداوشمار کو دیکھا جائے تو ملک بھر سے صرف چار فیصد خواتین لیڈرشپ پوزیشن تک رسائی حاصل کرنے میں کامیاب ہوتی ہیں جن کا تعلق ایلیٹ کلاس سے ہوتا ہے جبکہ دوسرے طبقوں سے تعلق رکھنے والی خواتین بنیادی ضروریاتِ زندگی پورا کرنے کے لیے معاشی استحکام کی جنگ لڑ رہی ہیں جس میں صنفی بنیاد پر اجرت میں انتہائی کمی کامسئلہ سرفہرست ہے۔انہوں نے کہا کہ اجرت میں صنفی بنیادوں پر تفریق بہت پرانا مسئلہ ہے جس پر آواز تو اٹھائی جاتی ہیں مگر صرف ایجنڈے اور ڈونرز کوخوش کرنے کے لیے پروگرامز کیے جاتے ہیں ۔ ملک بھر میں شہروں ، دیہاتوں میں ہزاروں  خواتین اپنے ہنر اور صلاحیتوں کے ساتھ معاشی طور پر مضبوظ ہونے کے لیے گھریلو سطح پر کاروبار اور ملازمتیں  کر رہی ہیں اور جنہیں  قابلیت اور محنت کے بدلے صنفی بنیاد پر اجرت میں تفریق کا سامنا کرنا پڑتا ہے ۔  ڈی آر ایف چاہے تو ملک بھر میں خواتین کا اجرت میں تفریق کے مسئلے کو سجنیدگی سے حل کرنے کے بارے میں اقدامات کر سکتی ہیں ۔

میڈیا ایکسپرٹ عروج رضا کا کہا ہے کہ پاکستان میں کسی بھی شعبے سے وابستہ خواتین کو صنفی بنیاد پر اجرت یا تنخواہوں سے نوازہ جاتا ہے۔ یہ تاثر عام لیا جاتا ہے کہ خواتین مردوں کے مقابلے میں زیادہ اور بہتر کام نہیں کر سکتیں جبکہ خواتین  سے دوگناہ زیادہ کام لیا جاتا ہے اور اداروں میں خواتین کے کام پر یقین مردوں کی نسبت زیادہ کیا جاتا ہے ۔ مجموعی صورتحال  پر نظر ڈالی جائے توخواتین کے کام کو اچھا سمجھا جانے کے  باوجود ’’کام کو کام ‘‘ تصور نہیں کیا جاتا ہے۔انہوں نے کہا کہ ملازمت پیشہ ہو یا اپنے ہنر ہر مبنی کاروبار کرنے والی خواتین ہوں، صنفی بنیادوں پر انتہائی کم اجرت کے حوالے سے آواز اٹھانے سے کتراتی ہیں کیوں کہ ملازمت ختم ہونے یا کاروبار میں اشیا کی فروخت میں مارکیٹ میں مشکلات کا سامنا کرنا پڑ سکتا ہے ۔ انہوں نے کہا کہ دوسرے شعبوں کی طرح میڈیا میں بھی خواتین صحافیوں کی تنخواہیں نہ ہونے کے برابر ہیں خاص کر خبر کی تلاش کرنے والی اور فیلڈ میں رپورٹ کرنے والی صحافی خواتین اجرت کے حوالے سے بری طرح صنفی تفریق کا سامنا کر رہی ہیں ۔ بات وہی آتی ہے کہ ملازمت سے نکلنے  اور دوسرے اداروں میں نوکری کے لیے مشکل پیش آتی ہے۔

واضح رہے کہ پاکستان میں صنفی بنیادوں پر اجرت میں تفاوت کے حوالے سے اداروں کے پاس کوئی پالیسیز موجودہ  نہیں ہے جبکہ خواتین اجرت میں برابری کی بنیاد پر ادائیگی کے حوالے سے قانون کے بارے میں کوئی معلومات نہیں رکھتی ہیں ، اجرت کے حوالے سے  آواز اٹھانے سے قاصر ہونے کے باوجود کام کرنے سے گزیز نہیں کرتی ہیں ۔ سیاسی اور سماجی حلقوں میں خواتین کو صنفی بنیادوں پر اجرت کی تفریق  کے حوالے سے آواز تو اٹھائی جاتی ہے مگرقومی اور صوبائی صتحہ کے اندر  عملی اقدامات کا فقدان مسئلہ کی تشاندہی سنجیدگی سے کرنے سے قاصر ہے۔

 ناہید جہانگیر

پسند کی شادی تھی شوہر بہت پیار کرتا تھا لیکن ساتھ ساتھ کردار پر شک بھی کرتا تھا وہ شک کی جڑیں اتنی مضبوط تھی کہشادی جیسے مقدس رشتے اور میری محبت کی کوئی پرواہ کیے بغیر طلاق کا داغ  لے کر میکے لوٹ آئی۔

پشاور شہر کی 30 سالہ ثمینہ اپنے طلاق کی ذمہ دار پاکستانی ڈارموں کو ٹہراتی ہیں  ان کی شادی 3 سال پہلے عادل نام لڑکے سے ہوئی تھی، وہ شادی سے پہلے ایک دوسرے کو پسند کرتے تھے ۔ کافی دھوم دھام سے شادی ہوئی لیکن چند دن بعد عادل شک کرتا اور ساتھ میں ڈراموں کی مثال بھی دیتا تھا۔

ثمینہ کے مطابق عادل زیادہ تر ڈرامے ‘میرے پاس تم ہو’ کی مثال دیتا تھا کہ بیوی کیسے شوہر کے ساتھ پیسوں کی لالچ میں دھوکہ کرتی ہیں ۔ اسی بات پر جھگڑا ہوجاتا اور اسی لڑائی میں ثمینہ جسمانی تشدد کے ساتھ ساتھ ذہنی تشدد کا بھی شکار ہوتی تھی۔ آخر کار طلاق ہوگئ۔

میرے پاس تم ہو 2020۔۔۔2019 میں ایک نجی ٹی وی پر چلنے والا سپر ہٹ ڈرامہ تھا جس کے مرکزی کردار عائزہ خان، ہمایوں سعید ور عدنان صدیقی نے ادا کئے تھے جبکہ اسکو خلیل الرحمان قمرنے تحریر کیا تھا۔

اس ڈرامے کے حوالے سے پشاور کی نورین بتاتی ہیں کہ پاکستانی ڈرامے جو کھبی تفریح  کا ذریعہ زریعہ ہوا کرتے تھے لوگ دن بھر کے کاموں سے تھک ہار کر شام کو ٹی وی دیکھتے تھے، معلومات کے ساتھ لطف اندوز ہوا کرتے تھے لیکن اب تو جو بھی چینل دیکھو تو اس پر 90 فیصد خواتین کے منفی کرداروں کے حوالے سے مواد ہوگا جیسے گھر والوں سے بغاوت کرکہ بھاگ کر شادی کرنا، طلاق ، محبت، خواتین کی لڑائی جھگڑے ، فساد کی جڑ وغیرہ پر مبنی ہوتے ہیں۔

نورین کہتی ہیں کہ ثمینہ صرف ڈراموں کی منفی سوچ کی نظر نہیں ہوئیں بلکہ روزانہ کتنی خواتین ہور ہی ہیں۔ کبھی کبھی لگتا ہے کہ پاکستانی ڈرامے آنے والی نسل کو خود کشی ، بغاوت ، افیرز کے نئے نئے طریقے بتا رہے ہیں ۔کہ کسیے اور کس وقت کیا کرنا ہے۔

نورین پیمرا اور ڈرامہ تخلیق کرنے والوں کو ذمیدار ٹھہرا کر اپیل کرتی ہیں کہ ڈراموں کے تھیم کو تبدیل کریں کیونکہ میڈیا ایک ایسی طاقت ہے جو ایک معاشرے کو بنا بھی سکتا ہے لیکن بگاڑنے میں بھی اہم کردار ادا کرتا ہے۔

اس حوالے سے نورالبشرنوید جو پاکستان ٹیلی وژن سنٹر پشاور میں 1980 سے ایک رائٹر کے طور پر کام کر رہے ہیں جنہوں نے بے شمار ڈرامے اردو اور پشتو زبان میں تحریر کیے ہیں، ان  کا کہنا ہے کہ ڈارمہ تحریر کرتے وقت یہ رائیٹر کی سوچ پرمنحصر ہے کہ جو کانٹینٹ وہ تحریر کر رہا ہے آیا وہ اس معاشرے کی درست ترجمانی کر رہا ہے یا یہ ڈرامہ کوئی بھی اپنی فیملی کے ساتھ دیکھ سکتا ہے جب بھی یہ چیزیں ذہن میں ہوں گی کوئی بھی منفی سوچ والی چیز نہیں تحریر ہوگی ۔

کیونکہ وہ سرکاری ٹیلی وژن کے ساتھ وابسطہ رہے ہیں تو ہمیشہ ڈارمہ تھیم کے ساتھ ساھ الفاظ کے چناؤ میں بھی خاص خیال رکھا جاتا تھا۔ لیکن اب حالات اس کے برعکس ہیں لوگوں کے ذہن میں جدت آگئ ہے جو بھی ڈارمے بن رہے ہیں وہ ہٹ ہو رہے ہیں اور اس پر کوئی اعتراض نہیں ہو رہا ہے ۔ صرف تنقید کرتے ہیں ۔جو چیز معاشرے کی بھلائی کی جگہ بگاڑ کا سبب بنتی ہوں اس پر ویوورز کی جانب سے ردعمل سامنےآنا بہت ضروری ہے اگر وہ ردعمل ظاہر نہیں کرتے تو اس قسم کے ڈرامے مزید بنیں گے اور ہمارے معاشرے کی خواتین کے حوالے سے منفی سوچ اور تصور کو مزید تقویت ملے گی۔

وہ بتاتے ہیں کہ بالکل ڈرامہ کسی بھی معاشرے کی ترجمانی کرنے میں اہم کردار ادا کرتا ہے لیکن بد قسمتی سے آج کل خواتین کے حوالے سے منفی سوچ رکھنے والے ڈرامے بن رہے ہیں ۔ ڈرامے کا زیادہ تر حصہ یا لیڈ کردار منفی سوچ والی خواتین ہی ہوتی ہیں جو ٹھیک نہیں ہو رہا ہے۔

اپنے معاشرے کے اقدار اور رسم و رواج کو نظر میں رکھ کر ڈرامہ تحریر کیا جائے ان تحریروں کو یا کرداروں کو ذہن میں رکھ کر یہ سوچیں کہ ان کا مثبت اثر پڑے گا  کہ نہیں، اثر مثبت ہے تو وہی چیز تخلیق کی جائے کیونکہ  اب ڈرامہ صرف گاؤں شہروں، صوبوں،م اور ملک کی حد تک نہیں دیکھے جاتے دنیا گلوبل ویلج بن چکی ہے انٹرٹینمنٹ نے سرحدوں کو پار کر لیا ہے پوری دنیا میں دوسرے ممالک کے ڈرامے، فلم دیکھے جاتے ہیں۔ اپنی زبانوں میں ان کے ترجمے ہوتے ہیں تو جو چیز اگر منفی دکھا رہے ہیں تو دوسرے ممالک کے  لوگ اس معاشرے کو اسی ڈرامے کے کرداروں کے ترازو میں تولیں گے۔

نورالبشر نوید بتاتے ہیں کہ ڈرامہ تخلیق کار خواتین کے حوالے سے منفی سوچ اور رجحانات کو کم کرنے کے ساتھ ساتھ ان کو بالکل ختم کرنے میں بھی اپنا اہم کردار ادا کر سکتے ہیں۔ جس رسم ورواج کو دنیا غلط نظر سے دیکھ رہی ہے شاید وہ ہمارے معاشرے میں مثبت ہو تو کیوں نا لوگوں کے ذہن سے وہ منفی رجحانات اپنے ڈراموں کے ذریعے ہٹائے جائیں۔

نورین مزید بتاتی ہیں کہ جو اداکارائیں منفی رول کرتی ہیں اور اس رول کو اپنا معمول بنا دیتی ہیں تو ان کے فینزبھی کم ہونا شروع ہوجاتے ہیں۔ انکو عائزہ خان بہت اچھی لگتی تھیں لیکن ‘میرے پاس تم ہو’ اور اب ڈرامہ سیریل ‘میں’  میں انکا منفی کردار دیکھ کر اچھی نہیں لگتیں۔ اور ایسا محسوس ہوتا ہے جیسے وہ واقعی ہی اپنی اصل زندگی میں بھی ایسی ہیں تو خواتین فنکاروں کو بھی خیال رکھنا چاہئے کہ ان کے فینز انکو کس روپ میں زیادہ پسند کرتے ہیں کیونکہ فینز کی وجہ سے فنکار لوگ ہیں ورنہ خاص سے عام بنانے میں انکو وقت نہیں لگے گا۔

ڈراموں میں خواتین کے منفی کرادر کے حوالے سے ایک ڈرامہ اداکارہ کیا سوچ رکھتی ہیں مینا شمس سے پوچھتے ہیں ۔ مینا نے اس دن سے ٹھان لیا تھا جس دن سے وہ شوبز میں آئی کہ وہ پختون رسم ورواج کے اندر رہ کر کام کریں گی اور اپنی ثقافت کے دائرے میں رہ کر نام بنائیں گی اور اپنے ارادے پر وہ ابھی تک قائم ہیں۔

مینا شمس پشتو، ہندکو اور اردو زبان کی مقبول اداکارہ ہیں جنہوں نے بے شمار ایوارڈز اپنے نام کئے۔ پی ٹی وی بہترین اداکارہ ایوارڈ، اے وی ٹی خیبر بیسٹ اداکارہ ایوارڈ، امن باچا خان ایوارڈ، ڈائریکٹریٹ آف کلچر ایوارڈ اور شمشاد ٹی وی سے بھی بیسٹ ادکارہ ایوارڈ شامل ہیں۔وہ بتاتی ہیں کہ ڈرامے ہی لوگوں کی ذہن سازی کرتے ہیں پہلے بھی ڈرامے ہوا کرتے تھے جو سبق آموز ہوا کرتے تھے اس میں بھی منفی کردار ہوا کرتے تھے لیکن کافی کم تناسب کے ساتھ خواتین کو منفی کرداروں میں دکھایا جاتا تھا لیکن اب تو ڈرامے کا تقریباً 90 یا 99 فیصد خواتین کے منفی کردار حاوی دکھائی دیتے ہیں تو لوگ وہی سوچ رکھیں گے کہ اس ملک یا اس خاص طبقے کے لوگ اسی طرح ہیں جس طرح ڈراموں میں دکھایا جاتا ہے۔کیونکہ باہر کے ملکوں میں لوگ اسی سوچ سے دیکھتے ہیں کہ ہر ڈرامہ یا فلم کسی بھی معاشرے کی ترجمان ہوتے ہیں اسی معاشرے کو وہ ڈرامے کی شکل میں پیش کرتے ہیں تو ان سے لوگ وہی اثر لیں گے کہ پاکستان کے لوگ  یا پشتون لوگ ایسے ہیں اسی لیے تو وہ لوگ ڈراموں میں بھی یہی دکھاتے ہیں۔ ہر ڈرامہ اپنے معاشرے کی نمائندگی کرتا ہے تو اس کا مطلب یہ ہے کہ معاشرے کی منفی سوچ لوگوں کو دکھا رہے ہیں اور زیادہ اہم یہ ہے کہ خواتین کی منفی کرداروں کو لوگوں کو دکھا رہے ہیں۔

مینا شمس اس کے حل کے حوالے سے کہتی ہیں کہ پہلے تو اس میں رائٹر بہت ہی اہم کردار ادا کر سکتا ہے وہ اپنی سوچ کو اپنے ڈرامے کی شکل میں پیش کرتا ہے۔ وہ ایسے کردار تخلیق کریں جن کا پیغام مثبت ہو اور منفی پربہت حاوی نا ہو۔ زیادہ ڈومیننٹ مثبت کردار دکھائی دیں۔

مینا شمس پشتو ڈراموں اور پروگراموں کی ایک مشہور شخصیت ہیں وہ کیسے ان منفی رجحانات اور کرداروں سے مقابلہ کرسکتی ہیں۔ سوال کے جواب پر کہتی ہیں کہ شوبز انکے شعبے کے ساتھ  انکا شوق بھی ہے ایک فنکار کے لئے ان کے فینز ہی سب کچھ ہوتے ہیں جب تک ان کے فینز ہیں تب تک وہ بھی ہیں۔ لوگ اتنے حساس ہوتے ہیں کہ ان ڈراموں کے کرداروں سے کافی اثر لیتے ہیں فیشن سے لے بول چال تک۔

اس لئے ایک فنکارہ کی حیثیت سے فینز جس کرادر میں انکو پسند نہیں کرتے وہ ان کرداروں سے دور ہی رہتی ہیں ۔آج کل سب ہی پڑھے لکھے اور سمجھدار ہیں جو چیز معاشرے کو سدھارنے کی بجائے بھگاڑ کا باعث بنتی ہیں ان سے دور ہی رہیں ۔

وہ مزید بتاتی ہیں کہ خواتین کے جو منفی کردار ڈومینینٹ ہورہے ہیں اس کے روک تھام کے لئے رائٹرز سے لیکر فنکار اور پھر پیمرا سے لے کر ناظرین تک کو اپنا کردار ادا کرنا ہوگا۔

دوسری جانب شازمہ حلیم جو پچھلے 35 سالوں سے میڈیا سے وابستہ ہیں مختلف ڈراموں پروگراموں میں کام کرنے کےعلاوہ انہوں نے 4 فلموں میں بھی کام کیا ہے۔ پاکستان ٹیلی ویژن، پی ٹی وی نیشنل اور ساتھ میں اے وی  ٹی خیبر،ریڈیو پاکستان میں بھی کام کیا، وہ واحد خوش قسمت فنکارہ ہیں جن کو 5 پی ٹی وی بیسٹ ڈرامہ ارٹسٹ ایوارڈ سے نوازا گیا ہے۔

ڈراموں میں خواتین کے حوالے سے منفی سوچ کے بڑھتے ہوئے رجحان سے اتفاق کرتی ہیں کہ ایسا ہی ہے آج کل جس طرح بھی ڈرامے بن رہے ہیں اس میں صرف خواتین کو ہی جھگڑا، فساد اور لڑائی کا ذمہ دار ٹھہرایا جاتا ہے اور جو سوسائٹی ہے یہ ڈرامے دیکھتی ہے تو ان پر منفی اثر انداز ہو رہی ہے، جس طرح لوگ ڈراموں میں دیکھتے ہیں کہ کس طرح گھر کو توڑا جاتا ہے اور ایک خاتون اس میں کیا کردار ادا کر رہی ہے اسی طرح اصل زندگی میں بھی پھر لوگ وہی اثر لیتے ہیں۔

لیکن شازمہ حلیم کہتی ہیں کہ ان کی نظرمیں ڈرامہ ٹیم  70 فیصد ذمیدار ہوسکتی ہے اس بات پر اتفاق کرتی ہیں  لیکن 30 فیصد اس کی ذمیدار ریاست ہی ہے اس کے علاوہ وہ لوگ ہیں جو قانون پاس کرتے ہیں وہ لوگ جو حکومتوں کو چلاتے ہیں وہ لوگ جوعدالتوں میں بیٹھے ہوئے ہیں وہ لوگ کچہری میں بیٹھے ہوئے ہیں جب تک حکومت ان چیزوں کے خلاف کھڑی نہیں ہوتی، ریاست کھڑی نہیں ہوتی تو ایک ارٹسٹ کچھ بھی نہیں کر سکتا کیونکہ ڈرامے کا تقریباً 95 یا 96 فیصد وہی ظلم ،جبر، مار پیٹ پر مشتمل ہوتا ہے لیکن ڈرامے کے آخری لمحات میں بالکل آخری سین میں وہ جزا سزا دکھایا جاتا ہے۔ جس نے برائی کی ہے یا جس نے غلط کام کیا ہے اس کا انجام برا ہوا ۔ تو ان حالات میں لوگ وہ زیادہ تر ڈرامے کا زیادہ پورشن جو تشدد کا دکھا رہا ہے وہ اثر لیں گا بنسبت اخری قسط کے اخری سین میں ایک جزا سزا سین کے۔

شازمہ حلیم کے مطابق اگر ڈرامے میں منفی کرداروں کو اتنا سر پہ چڑھایا دکھایا جائے گا کہ جیسے 19 قسط ڈرامہ میں 18 قسطوں میں ولن ظلم کرتا ہے اور وہی دیکھا جاتا ہے اور پھر آخری قسط میں ولن کا انجام برا ہوتا ہے تو یہاں پہ بھی ڈسکریمینیشن ہوتا ہے کیونکہ اس ڈرامے کے ساتھ انصاف نہیں کیا گیا برابری کا خیال نہیں رکھا گیا لیکن جو ڈرامےنشر ہو رہے ہیں ان میں ویورز بھی ذمیدار ہیں،  وہی چیز پسند کرتے ہیں اور وہی چیز چاہتے ہیں جس میں برائی ہو ۔ خاتون فساد کی جڑ ہو۔ اس قسم ڈراموں سے معاشرہ ظلم و تشدد پسند ہو گیا ہے اور ساتھ میں مردوں کے ذہنوں میں یہ بیٹھ گیا ہے۔ مرد جس جگہ بھی جاتا ہے اپنے ہی بیوی کی برائی کرتا ہے شک کرتا ہے اور پھر کہتے پھرتے ہیں کہ کیوں اس ڈرامے میں نہیں دیکھا عورت نے اپنے خاوند یا خاندان والوں کے ساتھ کیا کیا تھا۔

شازمہ حلیم نے کہا کہ ڈراموں میں ناظرین کے لئے کرداروں میں نا کسی کے لیے سبق ہے نہ ہیرو ہیروئن کی کردار سبق آموز جس سے معاشرہ غلط سمت جا رہا ہے۔ لوگ ڈراموں سے مثبت کی جگہ غلط اثر لے رہے ہیں کچے ذہن کی خواتین اسی ڈرامے کی طرح کے کردار بن کر اصل زندگی میں وہی راہ اختیار کرتی ہیں جو شاید ان کے لئے نقصان کیا موت کا پروانہ بن جاتی ہے۔

شازمہ حلیم ان سب مسائل کا حل حکومت کے پاس بتاتی ہیں کہ وہ آواز اٹھائیں ان ڈراموں فلموں ،سیریز پر پابندی لگائیں جس سے معاشرہ مثبت اثرات کی بجائے منفی اثرات لے رہا ہے تو بہت جلد ان چیزوں پر قابو پایا جا سکتا ہے۔  ان کی مثال عام سی ہے لوگ فیشن لائف سٹائل میڈیا سے ہی لیتے ہیں اسی طرح لوگ ان کرداروں کو بھی اپنی زندگیوں میں اہمیت دے کر غلط فیصلہ کر سکتے ہیں۔

حکومت یا پیمرا ان حالات کا مقابلہ کیسے کرسکتا ہے یا کس طرح اپنا اہم رول ادا کر سکتا ہے اس حوالے سے پیمرا کے سینئر مانیٹرنگ سپروائزر ماجد کا کہنا ہے کہ سب سے پہلے جو بھی کانٹینٹ بنتا ہے تو براڈ کاسٹ یا نشر ہونے سے پہلے انکا پی بی اے  یعنی پاکستان براڈ کاسٹنگ ایسوسی ایشن کی جانب سے جائزہ ہونا لازمی ہوتا ہے، وہ پہلے ایک مرحلے سے گزرتا ہے۔پھر کوڈ آف کنڈکٹ فار الیکٹرانک میڈیا اوربراڈکاسٹ میڈیا جس میں سیٹیلائٹ ٹی وی چینل اور ایف ایم براڈکاسٹ سٹیشن شامل ہیں، دوسرا کوڈ آف کنڈکٹ فار ڈسٹریبیوشن سروسز ہے جس میں کیبل ٹی وی آپریٹرز اور انٹرنیٹ پروٹوکول ٹی وی شامل ہیں جس کے لئے کوڈ آف کنڈکٹ موجود ہے۔ پیمرا کے ویب سائٹ پر بھی موجود ہے جس سے صاف واضح ہے کہ کیا نشر کرنا ہے اور کیا نشر نہیں کیا جا سکتا۔ پیمرا کے رولز کے مطابق تمام مواد کو فالو کیا جائے گا۔ جب بھی کوئی لائسنس کسی بھی میڈیا کو دیا جاتا ہے تو تمام ٹرمز اینڈ کنڈیشنز پر دستخط کیا جاتا ہے جس سے کسی بھی شکایت یا غیر اخلاقی مواد نشر کرنے کی صورت میں لائسنس منسوخ کیا جا سکتا ہے۔ جرمانہ عائد کیا جاسکتا ہے اور شوکاز نوٹس بھی دیا جا سکتا ہے۔

کونسل آف کمپلینٹ بھی موجود ہے جس میں کسی بھی کانٹینٹ کے خلاف شکایت درج کی جاسکتی ہے ان کے 4 ممبرز ہوتے ہیں جسکے خلاف بھی یہ شکایت درج ہو سکتی ہے انہیں باقاعدہ کونسل آف کمپلینٹ کی جانب سے بلایا جاتا ہے۔ان کا بھی موقف سنا جاتا ہے پھر اس کی روشنی میں پیمرا چیئرمین بشمول تمام ممبرز اس شکایت پر فیصلہ دیتا ہے۔

جہاں تک ڈرامہ ۔ فلم یا ڈاکومینٹری میں خواتین کے خلاف یا انکے منفی کرداروں کی بات ہے تو ہر وہ مواد جو شائع ہونے والا ہوتا ہے اس سے پہلے انکا پی بی اے کی جانب سے مکمل جائزہ ہونا لازمی ہے اسکے علاوہ کسی بھی وویور کی جانب سے شکایت بھی درج کی جاسکتی ہے کہ اس کانٹینٹ میں خاتون کی تذلیل ہوئی ہے یا غلط ، منفی تصور پیش کر رہا ہے تو بالکل کونسل آف کمپلینٹ کی جانب سے ایکشن لیا جاتا ہے۔

ان تمام باتوں سے یہ ظاہر ہوتا ہے کہ خواتین کو اپنے ڈرامے کے کردار کے ذریعے غلط روشنی میں پیش کرنے میں نا صرف ڈرامہ لکھار سے لے کر اداکاروں تک محدود ہے بلکہ حکومت تک سب ذمیدار ہیں لیکن اس میں خاطر خواہ  رول ویوورز کا بھی ہے اور شاید سب سے زیادہ قصور وار بھی وہی ہیں جب تک وہ اس قسم مواد کے خلاف ڈٹ کر کھڑے نہیں ہوں گے تو اسکا کوئی حل نہیں نکلے گا۔

خالدہ نیاز

میرا بھی دل چاہتا ہے کہ سوشل میڈیا استعمال کروں، ٹک ٹاک پر ویڈیوز بناوں لیکن میں ایسا نہیں کرسکتی کیونکہ نہ تو میرے پاس سمارٹ فون ہے اور نہ ہی مجھے تصاویر اور ویڈیوز بنانے کی اجازت ہے۔

یہ کہنا ہے ضلع نوشہرہ سے تعلق رکھنے والی ندا کا جو اس وقت ایف ایس سی پارٹ ٹو کی طالبہ ہے۔ ندا کا کہنا ہے کہ اس کو بھائی نے سختی سے منع کیا ہے کہ موبائل کو ہاتھ بھی نہ لگائے اور اگر اس نے کہیں پہ تصاویر بنائی تو یہ اس کے کالج کا آخری دن ہوگا۔ ندا کا کہنا ہے کہ آجکل جدید ٹیکنالوجی کا دور ہے انکو پڑھائی کے لیے بھی سمارٹ فون کی ضرورت ہوتی ہے لیکن وہ موبائل استعمال نہیں کرسکتی کیونکہ اس کو اس کی اجازت نہیں ہے۔

ندا کا کہنا ہے اس کے علاقے میں لڑکیوں کو سوشل میڈیا استعمال کرنے کی اجازت نہیں ہے کیونکہ اس کی وجہ سے کوئی بھی انکی تصاویر اور باقی مواد کا غلط استعمال کرسکتا ہے اور یوں انکی زندگیوں میں طوفان کھڑا ہوسکتا ہے۔ ندا نے بتایا کہ سوشل میڈیا بذات خود غلط نہیں ہے لیکن لوگوں نے اس کا استعمال غلط کیا ہے جس کی وجہ سے لڑکیوں کے لیے مسائل بن جاتے ہیں اور پھر انکی طرح کئی لڑکیاں پڑھائی کے لیے بھی اس کا استعمال نہیں کرسکتی۔

کہیں کسی نے انکی تصاویر کو ایڈیٹ کرکے غلط استعمال تو نہیں کیا

پشاور سے تعلق رکھنے والی ایک نرس نسرین (فرضی نام) نے بتایا کہ ایک دن وہ بیٹھی فیس بک استعمال کررہی تھی جب اس کو مسینجرپر ایک میسج موصول ہوا۔ جب انہوں نے وہ میسج کھولا تو اس میں لکھا ہوا تھا کہ اس لنک پر کلک کرکے دیکھیں اس میں انکی اور انکے بوائے فرینڈ کی تصاویر اور چیٹ لیک ہوئی ہے۔ نسرین نے کہا کہ میسج دیکھ کر انکے پاوں سے زمین نکل گئی اگرچہ نہ تو انکا کوئی بوائے فرینڈ ہے اور نہ ہی کسی اور کے ساتھ کوئی تعلق لیکن ایک لمحے کو وہ ڈر گئی کہ کہیں کسی نے انکی تصاویر کو ایڈیٹ کرکے غلط استعمال تو نہیں کیا۔

نسرین نے جب اس لنک پر کلک کیا تو وہ نہیں کھل رہا تھا۔ بعد میں انہوں نے وہ لنک اپنی دوست کو بھیجا اور سارا قصہ سنایا۔ جب اپنی دوست کو وہ لنک بھیجا تو اس نے بتایا کہ اس میں کچھ بھی نہیں یہ ایک سپیم ہے۔ نسرین نے کہا کہ اس دن کے بعد سے وہ بہت ڈر گئی تھی اور یوں انہوں نے فیس بک اور مسینجر کا استعمال کرنا ہی چھوڑ دیا کیونکہ وہ اب بہت ڈر گئی ہے۔

خیبرپختونخوا میں خواتین جدید ٹیکنالوجی سے دور کیوں

خیبرپختونخوا میں زیادہ تر خواتین سوشل میڈیا اور جدید ٹیکنالوجی سے دور ہیں اس کی بڑی وجہ یہاں کا کلچر ہے۔ زیادہ تر مرد خواتین کو سوشل میڈیا استعمال کرنے کی اجازت نہیں دیتے اور خواتین کے پاس سمارٹ فونز بھی نہیں ہوتے۔

خیبرپختونخوا میں بہت کم خواتین کے پاس سمارٹ فونز ہوتے ہیں اور سوشل میڈیا تک انکی پہنچ نہیں ہوتی لیکن اگر کسی لڑکی یا خاتون کی کوئی تصویر یا ویڈیو سوشل میڈیا پر شیئر ہوجائے تو اسکی انکو بہت سخت سزائی دی جاتی ہے۔ اکثر اوقات ایسے کیسز میں مرد رشتہ دار خاتون یا لڑکی کو جان سے مار دیتے ہیں۔ رواں سال جنوری میں بھی ضلع چارسدہ میں ایک ایسا واقعہ پیش آیا تھا جب ایک لڑکی کی ویڈیو وائرل ہوئی تو اس کو والد نے جان سے ماردیا۔

چارسدہ میں 18 سالہ لڑکی کی ویڈیو وائرل ہوئی تو والد نے مار دیا

ضلع چارسدہ سے تعلق رکھنے والے صحافی محمد باسط خان نے اس حوالے سے بتایا کہ 18 سالہ لڑکی اسلام آباد میں ایک گھر میں کام کرتی تھی جہاں ایک لڑکے نے اسکی ویڈیو وائرل کی تو والد نے اس کو غیرت کے نام پر قتل کردیا۔ انہوں نے بتایا کہ پاکستان میں خواتین کو اکثر اوقات چھوٹی چھوٹی باتوں پر گھریلو تشدد کا نشانہ بنایا جاتا ہے اور کچھ کیسز میں قتل بھی کردیا جاتا ہے۔

محمد باسط خان نے کہا کہ خیبرپختونخوا میں خواتین کو کئی ایک پابندیوں کا سامنا ہے اور یہ پابندیاں انکے والد، بھائی اور باقی گھر کے مرد لگاتے ہیں جس کی وجہ سے ان میں موجود صلاحیتیں کبھی سامنے نہیں آتی۔ انہوں نے کہا کہ اس جدید دور میں بھی جب ایک عورت گھر سے کام کے لیے نکلتی ہیں تو انکے کام کو معیوب سمجھا جاتا ہے اور لوگ طرح طرح کی باتیں بناتے ہیں جس کی وجہ سے لوگوں کی بھی یہی سوچ ہے کہ خواتین گھر میں بیٹھ کر برتن دھوئیں، کھانا بنائیں اور بچے پالیں۔

محمد باسط خان کے مطابق پاکستان میں اس وقت انیس کروڑ موبائل صارفین موجود ہیں جن میں 5 کروڑ تعداد خواتین کی ہے جبکہ باقی مرد ہیں۔ انٹرنیٹ استعمال کرنے والی خواتین کی تعداد 2 کروڑ ہے جبکہ باقی خواتین انٹرنیٹ استعمال نہیں کرتیں۔ محمد باسط نے بتایا کہ خواتین کو اب سوشل میڈیا پر بھی تنگ کیا جاتا ہے، پہلے تو صرف گلی کوچوں میں انکے پیچھے لوگ آواز کستے تھے لیکن اب تو سوشل میڈیا پر بھی انکو نہیں چھوڑا جاتا۔ اگر کوئی خاتون آن لائن کاروبار کرتی ہیں تو ان کو لوگ آرڈر دے دیتے ہیں اور بعد میں انکار کردیتے ہیں کہ ہم نے یہ چیز نہیں لینی۔ بعض لوگ خواتین کو غیر اخلاقی میسجز بھی بھیجتے ہیں جس کی وجہ سے خواتین خود بھی تنگ آکر سوشل میڈیا کا استعمال کرنا چھوڑ دیتی ہیں۔

خواتین آن لائن ہراسمنٹ کے حوالے سے گھر میں بتا نہیں پاتی

خواتین کا مسئلہ یہ بھی ہے کہ انکو جب آن لائن طور پر ہراساں کیا جاتا ہے تو وہ گھر والوں کو بھی نہیں بتا پاتی کیونکہ یہاں جب خواتین اس حوالے سے بات کرتی ہیں تو ان پر پابندیاں لگائی جاتی ہیں اور یوں بہت ساری خواتین چپ سادھ لیتی ہیں۔

محمد باسط خان نے کہا کہ ہماری خواتین میں بہت ٹیلنٹ موجود ہے جو بہت آگے جاسکتی ہیں لیکن بدقسمتی سے ہمارا معاشرہ اور ہمارا کلچر انکے آڑے آجاتا ہے۔ ایک خاتون کا ذکر کرتے ہوئے انہوں نے کہا کہ ایک خاتون آن لائن بزنس کرتی ہیں، بہت ٹیلنٹڈ ہیں لیکن ان کو گھر والوں نے اس شرط پر اس کی اجازت دی ہے کہ کسٹمر سے وہ بات نہیں کریں گی بلکہ اس کا بھائی یا کوئی اور مرد کرے گا تو اس سے اندازہ لگایا جاسکتا ہے کہ ہم نے خواتین کو کتنا خودمختار بنایا ہے۔ وہ خاتون جو ایک کام میں مہارت رکھتی ہیں کسٹمر کو اچھے سے ڈیل کرسکتی ہیں اور کاروبار کو کامیاب بناسکتی ہیں وہ اس کا بھائی یا کوئی اور نہیں کرسکتا لیکن مسئلہ پھر وہی آجاتا ہے کلچر کا۔

محمد باسط خان نے مزید بتایا کہ کچھ خواتین کو سائبر کرائمز کے حوالے سے قانونی راستوں کا بھی پتہ ہوتا ہے لیکن وہ اول تو کیس نہیں کرتی یا اگر کرتی بھی ہیں تو معاشرتی دباؤ اور گھر والوں کی عزت کی خاطر واپس لے لیتی ہیں۔

کوہستان ویڈیو سکینڈل

چارسدہ کا واقعہ اپنی نوعیت کا پہلا واقعہ نہیں ہے۔ اس سے قبل بھی کئی خواتین اور لڑکیوں کو سوشل میڈیا ویڈیوز کی وجہ سے مسائل کا سامنا کرنا پڑا ہے۔

دو ہزار بارہ میں ضلع کوہستان کے علاقے پالس میں ہونے والی ایک شادی کی ویڈیو وائرل ہوئی تھی جس میں پانچ لڑکیوں کی تالیوں کی تھاپ پر دو لڑکے رقص کررہے تھے۔ بعد ازاں رپورٹس سامنے آئی تھی کہ ویڈیو میں نظر آنے والی پانچوں لڑکیوں کو قتل کردیا گیا ہے۔

اس کے علاوہ رپورٹس کے مطابق دو ہزار چودہ میں بھی لوئر دیر کے علاقے جندول میں بھائی نے اپنی 13 سالہ بہن کواس لیے قتل کردیا تھا کیونکہ وہ موبائل استعمال کرتی تھی اور بھائی کو شک تھا کہ اس کی بہن مردوں سے بات کرتی ہیں۔

پاکستان ٹیلی کمیونکیشن اتھارٹی کے مطابق چار کروڑ ساٹھ لاکھ سوشل میڈیا صارفین میں 78 فیصد مردوں کے مقابلے میں خواتین کی شرح صرف 22 فیصد ہے۔

پاکستان میں ڈیجیٹل گیپ بہت زیادہ ہے

گورنمنٹ کامرس کالج پشاور کی اسسٹنٹ پروفیسر عروج نثار کہتی ہیں کہ آج کا دور جدید ٹیکنالوجی کا ہے اور وہی قومیں ترقی کی راہ پر گامزن ہوسکتی ہیں جو اس ٹیکنالوجی کا صحیح استعمال کریں گی۔ انہوں نے کہا کہ پاکستان میں ڈیجیٹل گیپ بہت زیادہ ہے بہت کم لوگ ہیں جو ڈیجیٹل ٹیکنالوجی سے استفادہ حاصل کررہے ہیں۔

عروج نثار نے کہا کہ زیادہ تر لوگوں کی نہ تو ڈیجیٹل ٹیکنالوجی تک رسائی ہے، نہ ہی انکو اس کا استعمال آتا ہے اور نہ انکو اس کے استعمال کی اجازت ہے۔ انہوں نے کہا کہ پاکستان میں خواتین ڈیجیٹل ٹیکنالوجی سے بہت دور ہیں جس کی بہت ساری وجوہات ہیں۔ ان وجوہات میں ایک یہ بھی ہے کہ اگر خواتین کو ٹیکنالوجی تک رسائی دی جائے گی تو وہ اپنے حقوق سے باخبر ہوجائیں گی اور اپنے فیصلے خود کرنے لگ جائیں گی جبکہ معاشرہ اس چیز سے ڈرتا ہے۔

خیبرپختوںخوا اور قبائلی اضلاع کی خواتین کی ڈیجیٹل ٹیکنالوجی تک رسائی کے حوالے سے عروج نثار نے بتایا کہ ہماری خواتین اس سے کوسوں دور ہیں۔ قبائلی اضلاع میں تو مرد بھی سوشل میڈیا اور ان چیزوں سے دور ہیں لیکن خواتین کے لیے تو وہاں سوشل میڈیا اور ڈیجیٹل ٹیکنالوجی کا تصور بھی نہیں ہے۔ قبائلی اضلاع میں خواتین کے پاس موبائل فونز نہیں ہوتے انکے پاس سادہ فونز ہوتے ہیں جو صرف ضرورت کے لیے ہوتے ہیں انکو سمارٹ فونز رکھنے کی اجازت نہیں ہوتی۔

رائٹ ٹو انفارمیشن بنیادی حقوق میں سے ایک ہے

عروج نثار نے بتایا کہ ہمارے صوبے میں لڑکیوں کے لیے سمارٹ فونز رکھنا معیوب سمجھا جاتا ہے۔ انہوں نے کہا کہ ہر وہ چیز جس سے خواتین معاشی یا سماجی طور پر خودمختار ہوتی ہیں وہ انکے لیے معیوب تصور کی جاتی ہیں۔

عروج نثار نے کہا کہ رائٹ ٹو انفارمیشن بنیادی حقوق میں سے ایک ہے اور ٹیکنالوجی کے ذریعے ہی کوئی انسان ہرقسم کی معلومات حاصل کرسکتا ہے لیکن یہاں خواتین اس بنیادی حق سے محروم ہیں۔ عروج نثار کے مطابق جب تک ہم آدھی آبادی یعنی خواتین کو بنیادی حقوق نہیں دیں گے، جدید ٹیکنالوجی تک رسائی نہیں دیں گے تب تک ہم ایک کامیاب قوم نہیں بن سکتے۔ انہوں نے کہا کہ خواتین کو ڈیجیٹل ٹیکنالوجی تک نہ صرف رسائی دینے کی ضرورت ہے بلکہ انکو اس سلسلے میں ٹریننگز بھی دینی چاہیئے تاکہ وہ اس کا مثبت استعمال کرکے نہ صرف خود معاشی طور پر خودمختار ہو بلکہ ملک و قوم کی ترقی میں بھی اپنا کردار ادا کرسکیں۔

کچھ خواتین خود بھی سوشل میڈیا پرگمنام رہنا چاہتی ہیں

مردان سے تعلق رکھنے والے افتخارخان نے بتایا کہ سوشل میڈیا کا منفی اور مثبت دونوں طریقوں سے استعمال ہورہا ہے اور بدقسمتی سے ہمارے معاشرے میں اس کا منفی استعمال زیادہ ہے۔ انہوں نے کہا کہ یہ بات ٹھیک ہے کہ زیادہ تر گھرانوں میں خواتین کو سوشل میڈیا استعمال کرنے کی اجازت نہیں دی جاتی لیکن دوسری طرف کچھ خواتین خود بھی سوشل میڈیا پر اپنی شناخت چھپانا چاہتی ہیں اور فیس بک پر اکثر خواتین تبدیل نام کے ساتھ آئی ڈی بنادیتی ہیں۔ خواتین اس کو استعمال کرنا چاہتی ہیں، مختلف گانوں، ڈراموں اور باقی پوسٹوں کو شیئر اور لائیک تو کرتی ہیں لیکن وہ چاہتی ہیں کہ جس کمیونٹی میں وہ رہ رہی ہیں وہ انکے حوالے سے زیادہ معلومات نہ رکھیں کہ وہ کیا شیئر کرتی ہیں یا کیا پسند کرتی ہیں کیونکہ انکو معاشرے کے لوگوں کی وجہ سے مشکلات کا سامنا کرنا پڑسکتا ہے۔

افتخارخان نے کہا کہ سوشل میڈیا رابطوں کا سب سے تیز اور آسان ذریعہ ہے اور ہمارے معاشرے کے مرد نہیں چاہتے کہ انکی خواتین کسی کے ساتھ رابطے میں رہیں اس لیے وہ سوشل میڈیا کا استعمال کریں۔ انہوں نے کہا کہ سوشل میڈیا کے ذریعے ہر انسان چاہے وہ مرد ہو یا عورت معلومات تک رسائی حاصل کرسکتا ہے۔ اگر خواتین کو سوشل میڈیا اور ڈیجیٹل ٹیکنالوجی تک رسائی نہیں دی جائے گی تو وہ نہ تو مثبت طریقے سے سوچ سکتی ہیں اور نہ ہی وہ کوئی کاروبار شروع کرسکتی ہیں۔

زنیرہ رفیع

’’کسی نئی دلہن کے قریب نہیں جانا‘‘

’’حاملہ خاتون سے دور رہو، اسے پرچھاواں نہ ہو جائے‘‘

’’کنواری لڑکیوں سے میل جول نہیں رکھنا، انہیں ماہواری کے مسائل در پیش آ سکتے ہیں‘‘

’’چالیس دن تک گھر میں نحوست رہتی ہے‘‘

’’یہ شادی کی کسی رسم میں حصہ نہیں لے سکتی ورنہ نئے جوڑے پر  اس کا برا اثر ہو جائے گا‘‘

’’ کسی غمی یا خوشی میں شریک نہیں ہوسکتی‘‘

یہ وہ تمام جملے ہیں جو ہمارے معاشرے میں ہر اس عورت کو سننے کو ملتے ہیں جو اسقاط حمل سے گزرتی ہے۔ اکیسویں صدی اور ٹیکنالوجی کے اس جدید دور میں بھی معاشرے کا کسی خاتون کے اسقاط حمل کے متعلق اتنا ہی دقیانوسی رویہ ہے، جتنا زمانہ جاہلیت میں تھا۔

پاپولیشن کونسل کی ایک رپورٹ کے مطابق پاکستان میں ہر سال ساڑھے 25 لاکھ سے زیادہ اسقاط حمل ہوتے ہیں۔ جن کے بعد ایک تہائی سے زیادہ خواتین کو صحت کے متعلق پیچیدگیوں کا سامنا کرنا پڑتا ہے، جبکہ خواتین کی صحت اور تولید سے منسلک مسائل پر کام کرنے والی مختلف مقامی اور بین الاقوامی تنظیموں اور حکومتی اداروں کے جمع کردہ اعداد و شمار کے مطابق پاکستان کا شمار دنیا میں اسقاط حمل کی سب سے زیادہ شرح  والے ممالک میں ہوتا ہے۔

ہم جس معاشرے میں رہتے ہیں اس کا ایک منفی رخ یہ بھی ہے کہ بد قسمتی سے ہمارے معاشرے میں لفظ تشدد کو ظاہری چوٹ یا زخم سے جوڑ دیا گیا ہے۔ جبکہ ہمارے اردگرد موجود تقریباً 90 فی صد لوگ ذہنی ڈپریشن کا شکار ہیں۔ اور وہ اپنے آپ سے ایک جنگ لڑ رہے ہوتے ہیں۔ اور یہ معاشرہ اس جنگ کو  مزید بڑھاوا دیتا ہے۔ لیکن کوئی بھی جذبات کے تشدد کو آج تک ٹھیک سے سمجھ ہی نہیں پایا اور یہی وجہ ہے کہ جذباتی تشدد کے حوالے سے ہمارے معاشرے میں کوئی آگاہی ہی نہیں ہے۔

’’مجھے اپنی ذات سب سے زیادہ مجرم اور شرمناک اس وقت محسوس ہوئی جب میری ہم پیشہ ساتھیوں نے مجھ سے بات کرنا چھوڑ دیا، ایسا محسوس کروایا گیا کہ اگر میں ان کے قریب سے بھی گزر گئی تو کہیں ان کی زندگیاں بے رنگ نہ ہو جائیں۔‘‘

22 برس کی کبرا 2 بچوں کی ماں ہیں، جو راولپنڈی کے ایک پرائیویٹ اسکول میں پڑھاتی ہیں۔ وہ گزشتہ برس ہی اسقاط حمل کے تکلیف دہ مرحلے سے گزر چکی ہیں۔ کبرا کہتی ہے کہ اسقاط حمل عورت کے بس میں تو نہیں ہے لیکن معاشرہ عورت کا جینا دوبھر کر دیتا ہے۔ وہ چار ماہ پریگننٹ تھی جب اس نے قدرتی طور پر اپنے بچے کو کھو دیا۔ اور یہ سب اس کے لیے اتنا اچانک تھا کہ جس کے بارے میں وہ کبھی سوچ بھی نہیں سکتیں تھیں۔ چونکہ وہ 4 ماہ پریگننٹ تھیں اور 4 ماہ میں بچے کے اعضاء بننا شروع ہو جاتے ہیں۔ کہتی ہے اس بچے کو محسوس کر کے کھو دینے کی تکلیف سے بڑھ کر کوئی تکلیف نہیں ہو سکتی، یہ سب کسی بے احتیاطی کی وجہ سے نہیں بلکہ قدرتی طور پر ہوا تھا، جسے انہوں نے اللہ کی رضا سمجھ کر بھلانے کی کوشش کی۔

’’دماغی اور جسمانی طور پر اس بات کو قبول کرنا میرے لیے اتنا آسان نہیں تھا ، مگر پھر میں نے سوچا کہ جب میں اسے اللہ کی رضا مان ہی چکی ہوں تو اس سب کو بھولانے کی کوشش کروں گی۔ لیکن معاشرہ بڑا ظالم ہے وہ آپکو بھولنے نہیں دیتا‘‘

کبرا نے مزید بتایا کہ ابھی تو جسمانی دردیں بھی تازہ تھیں، اور ذہن اس بات کو قبول کرنے کو بھی تیار نہیں تھا کہ جس بچے کو لے کر اس نے سہانے خواب دیکھ رکھے تھے وہ اب نہیں رہا تھا۔ اسپتال سے گھر آئی تو  وہ گھر پہلے کی طرح نہیں رہا تھا اس نے اپنے گرد عجیب سی ہلچل محسوس کی، اور وہ ہلچل ایسی تھی جس نے اسے ہر گزرتے دن کے ساتھ دماغی طور پر متاثر کیا۔ اور سب سے زیادہ اس کے لیے حیران کن بات یہ تھی کہ اس کے گھر میں موجود 2 عدد نندوں کا رویہ بہت مختلف ہو چکا تھا، جو اب کبرا سے بات کرنے میں بھی کتراتی تھیں یا اس کی بات کو سن کر بھی ان سنی کر دیتی تھیں۔ ’’میں نے محسوس کیا کہ اگر میں ان سے کوئی بات کرنا چاہ رہی ہوں تو وہ مجھے اگنور کر رہی ہیں۔ مجھے شروع میں وہم لگا مگر دن گزر رہے تھے اور صورتحال مزید بگڑ رہی تھی، میں اپنا دکھ، درد سب بھول گئی ان سب کے رویے میرے دماغ میں گھر کرتے گئے، جب ایک ہفتہ گزر گیا تو میں نے اپنی ساس سے پوچھا کہ مجھ سے سب ناراض ہیں۔ تو انہوں نے مجھے یہ کہہ کر چپ کروا دیا کہ ایسی صورتحال میں جب تک عورت کے 40 دن پورے نہیں ہو جاتے، وہ کسی سے بات نہیں کرتی اس لیے تم بھی گھر میں کسی سے بات نہ کرو اور کوشش کرو کے کمرے سے باہر نہ آو۔ کسی چیز کی ضرورت ہو تو مجھ سے کہو باقی چھوٹی بہنوں سے کچھ ٹائم کے لیے بات چیت سے بھی گریز کرو، اور پھر 40 دن بعد سب ٹھیک ہو جائے گا‘‘

اس نے بتایا کہ ’’تم کمرے سے باہر مت آو‘‘ یہ وہ جملہ تھا جس نے اسے یہ سوچنے پر مجبور کیا کہ اس نے ایسا کیا کر دیا ہے جو اس پر کسی سے بات کرنے پر بھی پابندی ہے۔ آخر اس کی غلطی کیا ہے۔ اور اس سوال کا جواب اسے تب ملا جب ایک محلہ دار آنٹی اس کی عیادت کرنے آئیں۔

’’میں نے انہیں اپنی ساس کو کہتے سنا کہ بچیوں کو کبرا کے پاس بھی مت جانے دینا ورنہ پرچھاواں ہو جائے گا۔ اور انہیں مسقبل میں حمل کے مسائل ہو سکتے ہیں۔ اس کے بعد کے الفاظ مجھے یاد نہیں کہ انہوں نے مزید کیا کہا، لیکن میں چند منٹ کے لیے کچھ سوچنے یا سمجھنے سے مفلوج ہو چکی تھی، اور بس ایک ہی جلمہ میرے دماغ میں گھوم رہا تھا۔ اور  میری آنکھوں سے بے اختیار آنسو گر رہے تھے۔ لیکن چاہ کر بھی ان آنسووں میں ربط نہ آسکا۔ یہ میری زندگی کا وہ لمحہ تھا جس کو سوچ کر آج بھی مجھے بہت تکلیف محسوس ہوتی ہے۔‘‘

کبرا نے اپنے اسقاط حمل کے دوران معاشرے کی ایک مزید دقیانوسی مثال سے پردہ اٹھاتے ہوئے بتایا کہ اس کی تکلیف کا دوسرا مرحلہ وہ درسگاہ تھی، جہاں سے کسی بھی بچے کی بنیادی تعلیم شروع ہوتی ہے۔

کبرا نے اپنی آنکھوں میں ابھرتے آنسوؤں کو جذب کرتے ہوئے اپنی کانپتی آواز میں بتایا کہ جب وہ گھر کے ماحول سے تنگ آگئی تو اس کے پاس اس صورتحال سے فرار کا ایک یہی راستہ تھا کہ وہ اسکول جانا شروع کر دے، جسمانی صحت کے ساتھ نہ دینے کے باوجود بھی جب اسقاط حمل کے بعد اسکول گئی تو وہاں تمام ساتھی ٹیچرز کے رویہ نے اس کی تکلیف کو مزید دوبالا کر دیا۔

’’سوچا تھا جاؤں گی تو میری سہیلیاں میرا حال معلوم کریں گی، مجھے حوصلہ دیں گی اور میرے بچے کے دکھ میں شریک ہونگی،مگر ان سب کو تو جیسے کوئی سانپ سونگھ گیا ہو، سب مجھ سے ایسے چھپ رہی تھیں اور دور بھاگ رہی تھیں جیسے میں کوئی ایسی بیماری ہوں، جو انہیں کھا جائی گی۔‘‘

میری زندگی کا برا وقت تو گزر گیا لیکن معاشرتی رویے نے میری ذہنی حالت کو بہت متاثر کیا اور مجھے اس ساری صورتحال سے نکلنے میں تقریباً ایک سال لگا جس میں اگر کسی نے مجھے سب سے زیادہ ہمت دی وہ میرا شوہر اور میری ڈاکٹر تھیں۔

یہ وہ اسقاط حمل ہے جو قدرت کی طرف سے لکھا تھا، دوسری جانب معاشرے کی وہ خواتین ہیں، جن کے حمل کا فیصلہ ان کے شوہر یا سسرال والے کرتے ہیں، باقی مرضی سے اسقاط حمل کا فیصلہ کرنا تو شاید اس معاشرے میں کسی جرم سے کم نہیں ہے۔ یہاں تلخ حقیقت یہ ہے کہ اگر عورت کرنا چاہے تو وہ نافرمان اور بد کردار ہے، اگر شوہر یا سسرال والے چاہیں تو ان کے فیصلے کی تکمیل کرنا عورت پر فرض ہے۔

سمیہ کی کہانی بھی اسقاط حمل کے گرد گھومتی ہے۔ مگر اس کے کیس میں اسقاط حمل نہ ہی تو قدرتی تھا اور نہ ہی اس کی مرضی سے ،بلکہ وہ اب تک اپنی ساس کی مرضی سے اور اپنی رضامندی کے خلاف 3 بار اس تکلیف دہ مرحلے سے گزر چکی ہیں۔

سمیہ نے اپنی دردناک کہانی سناتے ہوئے بتایا کہ اس کی 1 بیٹی ہے، دوسرے بچے کی خوشخبری کے بعد اس کی زندگی میں رنگوں کی بہار آنے ہی والی تھی کہ یہ خوشخبری اسے راس نہ آسکی۔ 3 مہینے  اس نے دن رات گن گن کر گزارے تھے۔ مگر وہ جب روٹین چیک اپ کے لیے ڈاکٹر کے پاس گئی، تو اس معلوم ہوا کہ اس کے بچے کو تھیلیسمیہ ہے۔،

’’یہ خبر سن کر میرے رونگٹے کھڑے ہوگئے تھے، اور کلینک سے نکلتے ہی  زاروقطار رونے لگی تھی، گھر آئی ساس کو پتہ چلا تو انہوں نے کہا کہ اس کا یہی حل ہے کہ جتنا جلد ہوسکے اسے ختم کروا دیا جائے۔ ان کا یہ جملہ سن کر مجھے ایسے لگا کہ میرا دل تکلیف سے پھٹ جائے گا لیکن چند دن گزرنےکے بعد میں نے سوچا کہ اگر میں نے ایسا نہ کیا تو اس کی پوری زندگی تکلیف میں گزرے گی، اور میں اپنی وقتی تکلیف کے بدلے اپنے جان کے ٹکڑے کو پوری زندگی کے لیے تکلیف نہیں دے سکتی‘‘

بہت سوچنے کے بعد نا چاہتے ہوئے بھی اس نے اپنی ساس کے فیصلے کو بہتر سمجھا اور اپنا حمل ضائع کروا دیا۔

ایک بار پھر سمیہ کے در پر امید کی کرن نے دستک دی تھی۔ اب کی بار اس کی خوشی کا کوئی ٹھکانہ نہیں تھا کیونکہ اس کو سب کہنے لگے تھے کہ حمل ضائع کروا دینے کے بعد اس کا حامل ٹھہرنا بہت مشکل ہوگا۔ اس نے سوچ لیا  تھا کہ اس بار وہ اللہ کی ہر رضا میں خوش ہوگی، لیکن اس کو پھر ڈاکٹر کی طرف سے دل دہلا دینے والا وہی جملہ سننے کو ملا، جس نے اس کی ذات کو ریزہ ریزہ کر دیا۔ جب ساس کو پتہ چلا تو تو اب کی بار وہ سمیہ سے خاصی ناراض بھی ہوئیں، اور کہا کہ ایسے بچوں کی پیدائش سے بہتر ہے کہ تم بچے پیدا ہی نہ کروں، اس نے اپنی ساس کو کہا کہ اس بار وہ حمل ضائع نہیں کروانا چاہتی اور اللہ کی رضا میں خوش ہے۔

’’مگر انہوں نے میری بلکل بھی نہیں سنی جس کے بعد میرے شوہر نے بھی مجھ سے زبردستی کی اور ڈاکٹر کے پاس لے گئے میں مجبور تھی اور ایک بار پھر میں نے اپنے بچے کا کھونا محسوس کیا۔ وہ میری ساس بری نہیں تھیں وہ میرا بہت خیال رکھتی تھیں مگر میں بھی ماں تھی، اور ایک ماں اپنے بچے کو کھوتے ہوتے نہیں دیکھ سکتی۔‘‘

ایک سال کے بعد گزشتہ برس دسمبر وہ ایک بار پھر امید سے تھی،اور اس بار وہ حمل سے خوش نہیں بلکہ پریشان ہوگئی تھی اور اس کے ذہن میں ماضی ایک بار پھر دوڑنے لگا تھا۔  کہتی ہے کہ اس نے اللہ سے رو رو کر دعائیں کی تھیں کہ اس بار اپنے بچے کو اپنے ہاتھوں میں لے سکوں بس اسے کچھ نہ ہو، ہر گزرتے لمحے کے ساتھ میری پریشانی میں مزید اضافہ ہو رہا تھا۔ اور تیسری بار بھی وہی خبر سنتے ہی میرا جسم سن ہو چکا تھا، لیکن اس نے گرتے آنسوؤں کے ساتھ ڈاکٹر سے یہ التجا کی  کہ وہ اس کی ساس کے سامنے ذکر نہ کریں۔ لیکن لاکھ چھپانے کے باوجود بھی اس کی ساس جان گئیں تھیں۔

’’ ان کو پتہ چلنے کے بعد انہوں نے میری زندگی اجیرن کر دی۔ ان کے جملوں نے میری زندگی میں اتنا زہر بھر دیا اور میں ہر وقت دعائیں کرنے لگی کہ میں اس بچے سمیت مر جاوں، اور ایک دن انہوں نے مجھ سے آکر کہا کہ تمہارا باپ یہاں کاروبار نہیں چھوڑ کر گیا کہ تم بیمار بچوں کو جنم دو اور ان کے علاج کے پیسے موجود ہوں. میرا بیٹا اس قابل نہیں کہ تم بیمار اولاد اس کے گلے ڈالتی جاو۔ وہ دن میرے لیے قیامت سے کم نہیں تھا، کہ میں نے ان کی باتوں سے جان چھڑوانے کے لیے جذبات میں آکراپنے بچے کو اپنے ہاتھوں سے قتل کیا، اب کی بار میں قاتل خود تھی، جس کے بعد میں نے اپنے شوہر کے کہنے پر آپریشن کروا دیا تاکہ میں مزید  حمل نہ ہو۔‘‘

میں آج بھی ڈپریشن کا شکار ہوں زندگی کے ان حادثات نے میری روح کو جلا دیا ہے، میں جسمانی طور پر جی تو رہی ہوں،لیکن اندر سے مکمل مر چکی ہوں۔ اب میں شوگر، بلڈ پریشر اور دل کے عارضے سے دوچار ہوں میرے تین بے قصور بچوں کا جانا مجھے ہر گزرتے دن کے ساتھ ختم کر رہا ہے۔ میں لوگوں سے، خوشیوں سے دور بھاگنے لگی ہوں، میں نفسیاتی طور پر پاگل ہو چکی ہوں، میرا دم گھٹتا ہے نہ ہی کہیں جاتی ہوں نہ ہی زیادہ میل جول رکھتی ہوں۔ اگر زندگی میں ہمت پکڑتی ہوں تو وہ یہ سوچ کر کے میری ایک عدد بیٹی ہے۔

برصغیر میں کب ،کتنے بچے کرنے ہیں اس کا اختیار کبھی عورت کو نہیں دیا گیا۔ عورت آج کے دور میں بھی  فیملی پلاننگ کا حصہ نہیں ہوتی۔ یہاں تک کہ آج بھی پاکستان کی تقریباً آدھے سے زیادہ آبادی فیملی پلاننگ کے لفظ سے نہ آشنا ہے۔ جبکہ شوہر بیوی کو یہ کہہ کر چپ کروا دیتا یے کہ مالی اخراجات کے حقوق پورے کرنا اس کی ذمیداری ہے تو لہذا اس بات کا فیصلہ کرنا بھی صرف اسی کا حق ہے۔ دوسری جانب ساس چونکہ گھر کی بزرگ سربراہ ہیں تو ان کی خواہش کا پورا ہونا لازمی ہے۔ صرف بچوں کی حد تک نہیں بلکہ کتنے بیٹے اور کتنی بیٹیاں چاہیے، جیسے بچے کسی فیکٹری میں آرڈر پر تیار کیے جاتے ہوں۔

 ماہر امراض نسواں ڈاکٹر فریصہ نے اس حوالے سے کہا کہ دنیا چاند پر بھی پہنچ جائے تو معاشرے کے ان دقیانوسی تصورات سے جان نہیں چھڑائی جا سکتی۔ کیونکہ معاشرے میں یہ چیزیں اس طرح گھڑی جا چکی ہیں کہ اب لوگوں کا یقین پختہ ہو چکا ہے ۔

انہوں نے مزید بات کرتے ہوئے کہا کہ میں بھی ایک عورت ہوں اور میں نے اپنے حمل کے دوران ایسی کئی خواتین کے کیسز لیے ہیں۔ جن کا قدرتی اسقاط حمل ہوا جس سے میرے حمل پر کبھی آنچ بھی نہیں آئی ،تو یہ سب دنیاوی من گھڑت باتیں ہیں جن کی حقیقت کچھ بھی نہیں ہے اور نہ ہی سائنس میں ایسا کچھ ہے۔

اس لیے خواتین کو اذیت دینا چھوڑ دیں حمل ختم ہونے کے بعد خواتین جسمانی اور دماغی طور پر اس حالت میں نہیں ہوتیں کہ وہ یہ سب باتیں سن سکیں ۔ عورت کو اس وقت سب سے زیادہ پیار اور توجہ کی ضرورت ہوتی ہے جبکہ اس صورتحال میں گھر والے تو کیا بلکہ بعض اوقات شوہر بھی طعنے دینے لگتے ہیں۔حالانکہ عورت کی یہ حالت قابل رحم ہوتی ہے۔ اسے اس اذیت میں مت الجھائیں کہ ایک حمل ضائع ہو جانے کے بعد وہ دوبارہ ماں نہیں بن سکتی، بعض خواتین 5 سے 6 اسقاط حمل کے بعد بھی ماں بن جاتی ہیں۔

سائیکالوجیکل ہیلتھ کیئر سینٹر کی کنسلٹنٹ، کلینیکل سائیکالوجسٹ سحرش افتخار کہتی ہیں کہ اسقاط حمل کے بعد خواتین ذہنی تناؤ کا شکار ہوجاتی ہیں،  اور خاص طور پر ان میں حوصلہ شکنی بہت زیادہ بڑھ جاتی ہے۔ کیونکہ انہیں لگتا ہے کہ مستقبل میں اب ان کے بچے ہی نہیں ہونگے۔ اس لیے ذہنی  کمزور ہو جاتی ہیں، ان میں نیند کی کمی کی شکایت بہت بڑھ جاتی ہے کیونکہ وہ ضرورت سے زیادہ حساس ہوجاتی ہیں، اور چونکہ ان میں اپنے اردگرد کے رویوں کو برداشت کرنے کی ہمت ختم ہو چکی ہوتی ہے اس لیے سماجی زندگی میں الگ تھلگ رہنے لگتے  ہیں۔ اور یہ سب چیزیں ان کے ڈپریشن کو مزید بڑھا دیتی ہیں۔ اور بعض اوقات ان کا ڈپریشن بہت بڑی بیماریوں کا سبب بھی بن سکتا ہے۔ عورت کو انسان سمجھا جائے اور اس بچے پیدا کرنے یا نہ کرنے کا پورا حق دیا جائے، کیونکہ پیدا کرنے سے لے کر اس کو پال پوس کر بڑا کرنے والی صرف ماں ہوتی ہے۔ اس لیے انہیں انسان سمجھیں نہ ہی کہ بچے پیدا کرنے والی مشین۔

پاکستان میں اسقاط حمل سے متعلق قانون:

پاکستان میں دو دہائیاں قبل تک صرف عورت کی جان بچانے کی خاطر اسقاط حمل کی قانونی اجازت موجود تھی، جبکہ 90 کی دہائی کے اواخر میں تعزیرات پاکستان کے  سیکشن 338 میں اضافی شق شامل کر کے بچہ دانی میں بننے والے بچے کے اعضا بننے سے قبل عورت کی جان بچانے کے لیے اسقاط حمل کی اجازت دی گئی۔ قانون کے تحت ان شرائط کے پورا نہ ہونے کی صورت میں اسقاط حمل جرم قرار پاتا ہے جس کے لیے 10 سال تک قید کی سزا دی جا سکتی ہے۔