زنیرہ رفیع

سوشل میڈیا  اور "انفلوئینسرز" نہ صرف ملک میں ڈیجیٹل منظر پر

 غلبہ حاصل کر رہے ہیں بلکہ کمپنیوں اور تنظیموں کے لیے کروڑوں روپے کی آمدنی پیدا کر رہے ہیں، جو اپنی مصنوعات کو فروخت کرنے اور روزمرہ کے صارفین سے منسلک رہنے کے لیے سوشل میڈیا انفلوئنسرز کا سہارا لے رہے ہیں

سوشل میڈیا کا بڑھتا ہوا رجحان نہ صرف روایتی اشتہاری طریقوں جیسے کہ ٹی وی، پرنٹ میڈیا کو پیچھے چھوڑ رہا ہے، بلکہ بہت تیزی سے پوری دنیا سمیت پاکستان میں بھی کاروبار کے مواقعوں کو بڑھا رہا ہے ۔ ڈیجیٹل دنیا کے موجودہ دور نے ہر چیز کو ایک  کلک کے ماتحت کر دیا ہے۔ اور جیسا کہ مستقبل کی قوت خرید نوجوانوں کے پاس ہے، کاروباری افراد اب اس بات سے باخوبی واقف ہیں کہ  انسٹاگرام، فیس بک یا ٹک ٹاک  انفلوئینسرز کے ذریعے ان کے کاروبار کو فروغ ملے گا۔

کرونا وبا کے دوران خواتین انفلوئنسرز نے نہ صرف چھوٹے کاروباروں سے فروخت کے رجحان میں اضافہ کیا ہے بلکہ نئے کاروباری لوگوں کو بھی آن لائن انڈسٹری سے متعارف کروایا ہے-

واضح رہے کہ سوشل میڈیا پاکستانی صارفین پر بہت گہرا اثر ڈال رہا ہے۔ پاکستان کی واحد انفلوئینسر مارکیٹنگ کمپنی ’’ولی‘‘ کی 2021 سے 2022 کی  ریسرچ کے مطابق پاکستان میں ایک ہزار سے زائد مارکیٹنگ مہمات چلائی گئیں جنکا مشترکہ ہدف 500 ملین سے زائد تھا جس سے یہ ثابت ہوتا ہے کہ پاکستان میں سوشل میڈیا کتنا اثرانداز ہورہا ہے-

پاکستان ٹیلی کمیونیکیشن اتھارٹی (پی ٹی اے) کی ایک رپورٹ کے مطابق، پاکستانیوں کے مختلف سوشل میڈیا پلیٹ فارمز پر 217.1 ملین پروفائلز ہیں، جن میں سے 70.1 ملین فعال سوشل میڈیا صارفین ہیں۔

ولی کی رپورٹ کے مطابق پاکستان میں خواتین انفلوئینسرز کی تعداد مردوں کے مقابلے میں زیادہ ہے، کیونکہ سوشل میڈیا پر اثر انداز ہونے والی خواتین برانڈز کے لیے زیادہ پیسہ اورخریدار لاتی ہیں خاص طور پر ان برانڈز کے لیے جو فیشن یا طرزِ زندگی سے متعلق مصنوعات اور خدمات کو  فروخت کرتی ہیں۔  رپورٹ کے مطابق پاکستانی سوشل میڈیا اسٹارز کو بین الاقوامی سطح پر اپنے ہم منصبوں پر برتری حاصل ہے،کیونکہ  وہ نہ صرف کثیر لسانی، متنوع شکل و صورت رکھتے ہیں۔ بلکہ عالمی زبان(انگریزی) میں بات چیت کرنے کے قابل ہیں، جو خاص طور پر پڑوسی مشرق وسطیٰ کے خطے کے حریفوں کے پاس نہیں ہے ۔ اور اگر قومی سطح پر پاکستانی انفلوئینسرز کی حوصلہ افزائی کی جائے، تو پاکستان اپنے سوشل میڈیا انفلوئیسرز کے ذریعے غیر ملکی صارفین کو بھی متوجہ کر سکتا ہے۔ اور پاکستان میں ایک بڑے پیمانے پر زرمبادلہ کے ذخائر لا سکتے ہیں

 ولی کمپنی کی انفلوئینسر پرفارمنس لیڈ قرۃالعین فاطمہ راشد کہتی ہیں کہ ’ پاکستان میں کل کتنے انفلوئینسرز اس وقت موجود ہیں۔ اس کے متعلق صیحیح اعدادوشمار بتانا تھوڑا مشکل ہے۔ مگر کچھ مارکیٹنگ پلیٹ فارمز کے  اشتراک  کے مطابق مختلف اعداد و شمار موجود ہیں اور اس بنیاد پر ہمارا اندازہ ہے کہ اس وقت تقریباً 500,000 سے زیادہ فعال انفلوئینسرز مختلف پلیٹ فارمز پر موجود ہیں۔اور ولی کمپنی سے رجسٹرڈ انفلوئنسرز کی تعداد اس وقت تقریباً 1 لاکھ 58 ہزار ہیں, جہاں تک خواتین انفلوئنسرز کی بات ہے اگر مارکیٹنگ کیمپینز کو دیکھا جائے تو انسٹاگرام اور ٹک ٹاک پر خواتین کی ایک بڑی تعداد نظر ہے. جس سے اس بات کا اندازہ لگایا جا سکتا ہے کہ خواتین کتنا زیادہ مارکیٹنگ میں اپنا کردار ادا کر رہی ہیں، ان کا مزید کہنا تھا کہ کوئ بھی بڑا برانڈ اٹھا کر دیکھ لیں، خواتین ہی نظر آتی ہیں. کیونکہ فیشن انڈسٹری انفلوئنسر مارکیٹنگ پر بہت پیسہ لگا رہی ہے کیونکہ بہت سے انفلوئنسرز کے ملین میں فالورز ہیں اور اس طرح وہ برانڈ 3 گناہ سے بھی زیادہ پیسے کما رہے ہوتے ہیں

ثانیہ سعید فیشن اور لائف اسٹائل بلاگر ہیں جن کے 137 ہزار فالوورز ہیں، انہوں سے خواتین کے اکانومی میں کردار کے حوالے سے بات کرتے ہوئے بتایا کہ خواتین انفلوئنسرز اس وقت ہرچھوٹے اور بڑے برانڈ کے لیے کام کر رہی ہیں اور پچھلے کچھ عرصے میں خواتین انفلوئنسرز کا رجحان کافی زیادہ بڑھ چکا ہے. جو کہ ایک خوش آئند بات ہے، اور اس چیز سے ظاہر ہوتا ہے کہ خواتین انفلوئنسرز اکانومی میں ایک بڑے پیمانے پر اپنا حصہ ڈال رہی ہیں، مرد انفلوئنسرز، خواتین کے مقابلے میں بہت کم ہیں-

ہر انفلوئنسر کسی نہ کسی برانڈ کے ساتھ جڑی ہوئی ہیں. جس کی وجہ سے اس انفلوئنسر کے تمام فالورز تک پراڈکٹ کے بارے میں معلومات جاتی ہے. چھوٹے کاروبار جتنے بھی ہیں زیادہ تر نے سوشل میڈیا انڈسٹری میں خواتین انفلوئنسرز کی بدولت نام کمایا ہے، ایسے بہت سے کاروبار ہیں جنہوں نے زیرو سے شروع کیا تھا اور آج وہ برانڈ بن چکے ہیں اس میں خواتین انفلوئنسرز کا بھی اتنا ہی اہم کردار ہے جتنا ان کی پراڈکٹ کا اچھا معیار ہے-

ایک سوال پر ثانیہ کہتی ہیں لوگ شاید سمجھتے ہوں گےکہ انفلوئنسر ہونا ایک بہت ہی آسان کام ہے جب کہ ایسا نہیں ہے انفلوئنسر کو ہر پراڈکٹ کو مختلف انٹرٹینمںٹ کے ساتھ پیش کرنا پڑتا ہے، انہوں نے اپنی حالیہ سینیٹری پیڈز کی کیمپین کے متعلق بات کرتے ہوئے کہا کہ مجھے ٹک ٹاک پر اس سینیٹیری پیڈ کی آگاہی دینے پر لوگوں نے گالیاں تک دی ہیں، تو انفلوئنسر ہونا اتنا آسان نہیں ہے، کیونکہ یہ سب چیزیں آپ کو دماغی طور پر تنگ کرتی ہیں

ایک اور سوال پر ثانیہ کہتی ہیں آج تک جتنے بھی برانڈز نے خواتین انفلوئنسرز کے سہارے مارکیٹ میں اپنا نام کمایا ہے اور آج انکا کاروبار ایک برانڈ بن چکا ہے تو اکانومی میں ان کا حصہ مانا  جاتا ہے جب کہ اس برانڈ کے ساتھ ساتھ اس کا کریڈٹ اس خاتون انفلوئنسر کو بھی جاتا ہے. اور براہ راست نہ سہی مگر بالواسطہ طور پر اس خاتون کا بھی ہماری معیشت میں اتنا ہی حصہ ہے-

ایمان شاہد عباسی لائف اسٹائل سوشل میڈیا انفلوئنسر ہیں جن کے انسٹاگرام پر 42 ہزار سے زائد فالورز ہیں کہتی ہیں کہ انہوں نے ابھی تک بہت سے چھوٹے کاروبار کی پراڈکٹس کو پروموٹ کیا ہے. کم از کم 35 سے 40 کے درمیان ایسے کاوروبا ہیں جن کے لیے وہ کام کر چکی ہیں جس کے بعد ان کی سیل میں خاطر خواہ اضافہ بھی ہوا. کوشش رہی ہے کہ  چھوٹے اور نئے آنے والے بزنس کمیونٹی کو زیادہ سپورٹ کیا جائے تاکہ وہ ان کا بزنس آگے بڑھ سکے.

'اس سب میں میرے فالورز نے مجھے بہت سپورٹ کیا ہے کیونکہ انہوں نے مجھ پر اعتماد کر کے ان پراڈکٹس کو استعمال کیا اور ہر کاروبار کو آگے بڑھنے میں میری مدد کی ہے'

ایمان کا مزید کہنا تھا کہ کسی بھی انفلوئنسر کے لیے اپنے فالورز کا اعتماد جیتنا اتنا آسان نہیں ہوتا، مگر ایک بار آپ کے فالورز آپ پر یقین کرنا شروع ہوجائیں تو چیزیں آسان ہونے لگتی ہیں، لوگ انفلوئنسرز کی زندگی کو بہت اچھا سمجھتے ہیں کامنٹ باکس میں اتنی گالیاں بھی سننے کو ملتی ہیں مگر بہت سے لوگ آپ کی تعریف بھی کر رہے ہوتے ہیں، اس لیے انفلوئنسر کو ہر طرح کی زبان برداشت کرنی پڑتی ہے اور ہمیشہ لوگوں کو اس پراڈکٹ کی جانب راغب کرنے کے لیے ایک نئی طرح سے مارکیٹ کرنا پرتا ہے، تاکہ لوگ اسے دیکھیں، اور متاثر ہو کر خریدیں.

ایک سوال کے جواب میں ایمان نے بتایا کہ کچھ انفلوئنسرز بھی کہیں جگہ پر صرف پیسے کمانے کے لیے بری پراڈکٹ کو اچھا پیش کرتے ہیں جو کہ ایک نہایت ہی غلط حرکت ہے، 'میں سمجھتی ہوں کہ انفلوئنسر ہونا ایک بہت بڑی زمہ داری ہے جس میں ہر پراڈکٹ کا دیانتداری کے ساتھ ریویو دینا ہر انفلوئنسر کو اپنے پر فرض کر لینا چاہیے اور اس میں کوئ شک نہیں ہے کہ سوشل میڈیا سے شروع ہونے والے بھی بہت کاروبار خواتین انفلوئنسرز کی وجہ سے بہت بڑے پیمانے پرپہنچ چکے ہیں اور تقریباً 70 فی صد کاروبار کو آگے بڑھانے اور ان کی سیل میں اضافہ خواتین انفلوئنسرز کی وجہ سے ہی ہے، خاص طور پر فیشن انڈسٹری سے منسلک جو کاروبار ہیں'

نینا الیاس ایک فوڈ بلاگر ہیں، جن کے تقریباً 38 ہزار سے زائد فالورز ہیں بات کرتے ہوئے نینا نے بتایا کہ انہوں نے بے شمار چھوٹے کاروباروں کی چیزوں کو پروموٹ کیا ہے خاص طور پر ہوم بیسڈ کچن، جو خواتین گھروں سے اپنا کاروبار چلا رہی ہیں کہتی ہیں 2 سال کے بلاگنگ کے سفر  میں انہوں نے جتنے بھی کاروباروں کو پروموٹ کیا ہے ان کی جانب سے نینا کو ہمیشہ مثبت جواب ہی موصول ہوا ہے، آج کل سوشل میڈیا کا دور ہے اور کسی بھی کاروبار کو برانڈ بننے میں سوشل میڈیا کی مدد کی ضرورت ہے، اور سوشل میڈیا پر وہ تب ہی ترقی کر سکتے ہیں جب سوشل میڈیا انفلوئنسرز ان کے پراڈکٹس کو پروموٹ کرتے ہیں یوں ان چھوٹے بزنس کو مزید فروغ ملتا ہے. اس بات میں کوئی شک نہیں ہے کہ دیگر شعبوں کی طرح خواتین انفلوئنسرز ہماری سوشل اکانومی میں بھی مردوں کے شانہ بشانہ کردار ادا کر رہی ہیں

فجز آئس کریم کے مالک وقار احمد کہتے ہیں کہ ان کے کاروبار کو آگے بڑھانے میں کچھ بلاگرز کا بہت اہم کردار ہے- وہ کہتے ہیں کہ جب انہوں نے کاروبار شروع کیا تو ان کے پاس اتنے پیسے نہیں تھے کہ وہ اپنی مشہوری کروا سکیں مگر ایک دوست کے مشورے پر انہوں نے ایک بلاگر کو چند ہزار دے کر اپنی آئس کریم کی مشہورکروائی، جس کے بعد ان کی سیل میں تھوڑا اضافہ ہوا، اور اس کے بعد انہوں نے دو سے تین مختلف خواتین بلاگرز کے ذریعے اپنی سوشل میڈیا تک رسائی کے لیے پروموشن کروائی اور انہوں نے اپنا سوشل میڈیا پر اکاؤنٹ بھی بنوایا جس کی شروعات زیرو سے تھی آج ان کے فالورز میں کافی حد تک اضافہ ہوا ہے-

"سوشل میڈیا انفلوئنسرز کے ذریعے میری آئس کریم کی ویڈیوز تقریباً 82  ہزار لوگوں تک پہنچی ہے، جو کہ مجھ جیسے چھوٹے کاروباری شخص کے لیے ایک بہت بڑی کامیابی ہے. جب لوگ آکر کہتے ہیں کہ ہم نے انسٹاگرام یا فیس بک پر آپ کی آئس کریم دیکھی تھی اور اسی لیے ہم کھانے آئے ہیں تو بہت خوشی ہوتی ہے. ورنہ آج کے دور میں کاروبار کو چلانا کوئی آسان کام نہیں ہے مگر سوشل میڈیا انفلوئنسرز کے باعث ہم چھوٹے کاروبار جن کو کوئی نہیں جانتا، پھر لوگ جاننے لگتے ہیں "

ایک سوال کے جواب میں انہوں نے بتایا کہ ہر چھوٹے سے چھوٹا کاروبار بھی چاہتا ہے کہ خاص طور پر خواتین انفلوئنسرز کے ذریعے اپنی پراڈکت کی پروموشن کروائی جائے تاکہ ان کی سیل میں اضافہ ہو اور ان کا کاروبار ترقی کرے۔

کراچی انسٹیٹیوٹ آف بزنس ایڈمنسٹریشن (آئ بی آے) کے پروفیسر اور اکنامکس ڈیپارٹمنٹ کے چیئرپرسن ڈاکٹر محمد ناصر نے بتایا کہ خواتین انفلوئنسرز کا اکانومی میں کتنا کردار ہے اس کے حوالے سے ابھی تک کوئی ریسرچ اسٹڈی نہیں ہوئی مگر دیکھا جائے تو خواتین انفلوئنسرز مارکیٹنگ میں اہم کردار ادا کر رہی ہیں کسی بھی کمپنی کے لیے اب لازم ہوتا جا رہا ہے کہ وہ اپنی پراڈکٹ کے لیے خواتین انفلوئنسرز کا انتخاب کریں کیونکہ سوشل میڈیا پلیٹ فارمز پر لوگوں کا رجحان بڑھنے لگ گیا ہے. کیونکہ آجکل ہر دوسرا بندہ سوشل میڈیا پر ہے اور یہی وجہ ہے کمپنیوں نے مارکیٹنگ کے روایتی طریقوں کو ترک کرتے ہوئے انفلوئنسرز کے ذریعے پراڈکٹ مارکیٹ کروانا شروع کر دیا ہے اور کمپنیاں انفلوئنسرز کے فالورز کو دیکھ کر ریٹ طے کرتی ہیں جو کہ ٹی وی اور اخبار سے بہت کم ہوتے ہیں. جب انفلوئنسرز پراڈکٹس مارکیٹ کرتے ہیں تو کسی بھی کاروبار کی سیل میں اضافہ ہوتا ہے جس کے بعد ان کی پراڈکٹ کی مینوفیکچرنگ میں بھی اضافہ ہوتا ہے جو روزگار کے نئے مواقع پیدا کرنے کے ساتھ  بھاری بھرکم پیسے بھی کماتے ہیں اور جب ان خواتین انفلوئنسرز کے فالورز مختلف ممالک میں ہوتے ہیں تو پھر کاروبار اپنے دائرے کو بڑھا لیتے ہیں اور یوں ملک میں فارن کرنسی آنا شروع ہوتی ہے، اور نئے آنے والے کاروباری افراد کے لیے یہ ایک اچھی چیز ہے کہ وہ بہت ہی کم پیسوں میں اپنی پراڈکٹ کو مارکیٹ کروانے میں کامیاب ہوتے ہیں-

اور جب انفلوئنسرز کے سوشل میڈیا پلیٹ فارمز مونوٹائز ہوں تو ان کو ڈالر کے حساب سے پیسے مل رہے ہوتے ہیں. جس کی وجہ سے ملک میں زرمبادلہ آتا ہے جو کہ ہماری معیشت کی بہتری  کے لیے بہت ضروری ہے-

"میں یہاں ایک چیز شامل کرنا چاہوں گا کہ ہر آن لائن کاروبار کے لیے ضروری ہے کہ وہ اپنی پراڈکٹ کے معیار کو اچھے سے اچھا بنائے تاکہ اس کا کاروبار آگے بڑھے جس سے اس اور ملک کی معیشت کو فائدہ ہو"

پروفیسر ڈاکٹر محمد ناصر کہتے ہیں کہ پاکستان میں ای کامرس کا رجحان بڑھتا جا رہا ہے۔ 2023 میں 6 بلین ڈالر محصول کی امید کی جا رہی ہے۔ اور اس میں ہر سال 6 فی صد کا اضافہ ہو رہا ہے۔ اور اس محصول میں سوشل میڈیا انفلوئنسرز کی محنت بھی شامل ہے-

سوشل میڈیا صارف عائشہ کہتی ہیں کہ سوشل میڈیا کی وجہ کوئی بھی پراڈکٹ خریدنا نہایت آسان ہو چکا ہے، وہ سوشل میڈیا پر بہت سی خواتین انفلوئنسرز کو فالو کرتی ہیں، کہتی ہیں کہ پہلے کوئی بھی چیز خریدنے سے پہلے بہت مشکل ہوتی تھی کہ پتہ نہیں کیسی ہوگی، مگر اب کوئی بھی پراڈکٹ لینے سے پہلے وہ ہمیشہ کچھ خاص انفلوئنسرز کی ویڈیوز دیکھ لیتی ہیں جن سے اس پراڈکٹ کے متعلق اتنی معلومات مل جاتی ہے کہ اس کو خریدنے یا نہ خریدنے کا فیصلہ کرنا نہایت آسان ہوجاتا ہے. ایک سے دو بار ہی ایسا ہوا ہے کہ کسی انفلوئنسر کے کسی پراڈکٹ کی حمایت پر وہ پراڈکٹ خریدا ہو اور وہ ٹھیک نہیں تھا، مگر اچھی اور بڑی انفلوئنسرز اپنی شہرت پر آنچ نہیں آنے دیتیں اس لیے وہ اپنے فالورز کے لیے ہمیشہ پراڈکٹ کا ایمانداری سے ریویو دیتی ہیں.

سویرا ارشد سوشل میڈیا کی ایک فعال یوزر ہیں جو اپنی اور اپنے بچوں کی 80 فی صد شاپنگ آن لائن کرتی ہیں،کہتی ہیں کہ کرونا وبا کے دوران جب سب بند ہوگیا اور عید الفطر کے دن قریب تھے تو اس وقت روزہ رکھ کر مارکیٹ جانا بہت مشکل تھا اور بچے بھی چھوٹے تھے اس لیے سمجھ نہیں آرہا تھا کہ کیسے عید کی شاپنگ کی جائے، کرونا وبا سے پہلے وہ سوشل میڈیا پلیٹ فارمز کچھ خاص استعمال نہیں کرتی تھیں. مگر وبا کے دوران جب سب بند تھا اور کچھ کرنے کے لیے بھی نہیں ہوتا تھا تو ان کا رجحان سوشل میڈیا کی جانب بڑھا تھا. کہتی ہیں اسی دوران انہوں نے سوچا کہ کیوں نہ عید کی شاپنگ آن لائن کر لی جائے، وہ کہتی ہیں کہ انہوں نے اپنے اور اپنے بچوں کے لیے کچھ آن لائن چیزیں منگوائیں، مگر پارسل کے ملنے کے بعد جب انہوں نے کھول کر دیکھا تو جس آن لائن سٹور سے انہوں نے خود کے لیے کپڑے منگوائے تھے ان کپڑوں کی کوالٹی بالکل بھی اچھی نہیں تھی جب کہ سوٹ کی قیمت اچھی خاصی تھیں۔

"میرا دل بہت خفا ہوگیا اور میں نے سوچ لیا تھا کہ آئندہ کبھی بھی آن لائن کچھ نہیں منگوانا، لیکن کچھ دن کے بعد اچانک ایک انفلوئنسر کی ویڈیو میرے سامنے آئی جس میں وہ اسی آن لائن سٹور کا ریویو دے رہی تھیں جن سے میں نے سوٹ منگوایا تھا اور وہ انفلوئنسر یہ کہہ رہی تھی کہ ان کے کپڑے کی کوالٹی انہیں اچھی نہیں لگی اس لیے اس سٹور سے کپڑے منگوانے سے پہلے کوالٹی کے بارے میں اچھی طرح معلومات لے لی جائے، جسکے بعد میرا اس انفلوئنسر پر یقین قائم ہوا، اسی طرح 4 سے 5 ایسی انفلوئنسرز ہیں جن کے ریویو پر میں آنکھیں بند کر کے یقین کرتی ہوں کیونکہ وہ ہمیشہ ایمانداری کے ساتھ ہر چیز کو بہت تفصیلاً بیان کرتی ہیں، اور اس میں بھی کوئی شک نہیں کچھ انفلوئنسرز صرف پیسے کی خاطر بری چیز کو بھی اتنا اچھا پیش کرتی ہیں کہ دیکھنے والا فوراً لینے پر مجبور ہوجائے جب کہ اس چیز کا معیار اتنا اچھا نہیں ہوتا"

اس تمام معلومات سے اس بات کا واضح طور پر اندازہ لگایا جا سکتا ہے کہ خواتین انفلوئنسرز پاکستان کی ڈیجیٹل اکانومی میں سر فہرست ہیں۔ یہ خود تو مونوٹائزیشن جیسے آپشنز سے پاکستان میں ڈیجیٹل زرمبادلہ لانے میں اہم کردار ادا کر رہی ہیں مگر ساتھ ہی ساتھ ملک کے چھوٹے صنعتی کاروبار کو نہ صرف پاکستان میں بلکہ عالمی سطح پر بھی متعارف کرواتی ہیں۔ جس سے پاکستان میں کاروبار کے مواقع بڑھ رہے ہیں اور ملک میں غیر ملکی زرمبادلہ بھی آرہا ہے۔

مگر یہاں پر ان خواتین کی آن لائن سیفٹی کے لیے کچھ ایسی پالیسیاں بنانے کی بھی ضرورت ہے جو ان کو تحفظ فراہم کر سکیں۔ تاکہ ملک میں دیجیٹل اکانومی کے مواقعوں کو بہتر طریقے سے استعمال کیا جا سکے

انیلہ اشرف

اپنے خوابوں میں حقیقت کا رنگ بھرنے کیلئے اعلیٰ تعلیم یافتہ نہیں بلکہ باشعور اور بااعتماد ہونا ضروری ہے۔ صنف اور جنس کی تفریق سے بالاتر ہوکر خواتین کو آگے بڑھنے کے مواقع دیئے جائیں اور ٹیکنالوجی پر ان کا بھی حق تسلیم کرلیا جائے توخواتین پاکستان اور اپنے خاندانوں کی معاشی حالت بدل سکتی ہیں۔ اس کی مثال پرائمری پاس شہناز پروین حنیف ہے،جو آج سے چند سال قبل تصور بھی نہیں کر سکتی تھی کہ ایک دن وہ اپنے کام کو منواتے ہوئے قومی اور بین الاقوامی سطح پر الگ پہچان بنائے گی اور نہ صرف اپنے گھریلو حالات بہتر کرے گی بلکہ اپنے جیسی ہنرمند خواتین کے روزگار کا ذریعہ بنتے ہوئے پاکستان کی معیشت میں بھی حصہ دار ہو گی۔ فاروق پورہ ملتان کی رہائشی شہنازپروین حنیف نےراقم الحروف سے گفتگو کرتے ہوئے بتایا کہ وہ  گھریلوحالات کے باعث پانچویں کلاس تک ہی تعلیم حاصل کر سکی ہے،اس کا شوہر درزی ہے جس کا ہاتھ بٹانے کیلئے وہ کبھی کبھار کڑھائی کرتی تھی، جس کے بعد اسے اپنا کام کرنے کا خیال آیا، جس کیلئے ابتدائی طور پر کمیٹی ڈالی کہ کچھ رقم جمع ہوجائے تاکہ وہ اپنا شوق پورا کرنے کیلئے آزادانہ اپنا کام کر پائے ،اس کے لئے جب کمیٹی نکلی تو مارکیٹ جاکر کپڑا ،دھاگااور دیگر ضروری اشیاءخریدیں ،چھاپہ لگوایا اور سامان کی خریداری کرتے ہوئےکام شروع کردیا۔ سوٹ تیار ہونے پر شوہر نے سلائی کردی ،تاہم سوال یہ تھا کہ انہیں کہاں اور کیسے جاکر فروخت کیا جائے۔اس کیلئے بہت تگ ودو کرنی پڑی، بہت عرصہ تک اشیاء فروخت ہی نہیں ہوئی، پھر ایک دن شوہر نے کہا سامان اٹھاؤ اور بازار چلو وہاں جاکر کچھ دکانوں پر کپڑے دیئے پھر کسی نے دوسری جگہ بتائی کہ وہاں جائیں ۔شہناز کا کہناہے کہ تعلیم کی کمی بھی ترقی کی راہ میں رکاوٹ بنی رہی مگر حوصلہ نہیں  ہارا ،پھر سنا تھا کہ لوگ آن لائن اپنے کپڑےاور دیگر چیزیں بیچتے ہیں تو کوشش کی کہ بٹنوں والے موبائل کی بجائے کوئی تصویر بنانے والا موبائل لوں مگر رقم نہیں ہونے کی وجہ سے پریشانی ہوئی ،بہت مشکل سے پیسے اکٹھے کرکے موبائل فون لیا اور خان بوتیک کے نام سے آن لائن کپڑے اور باقی چیزیں کی فروخت کرنی شروع کردی، جو ہاتھوں ہاتھ فروخت ہو جاتی تھیں مگر مجھے موبائل نہ تو ٹھیک سے استعمال کرنا آتا تھا اور نہ ہی مارکیٹنگ کا کچھ اتاپتا تھا ۔شہنازکہتی ہے کہ شوہر کے ساتھ اور محنت نے رنگ دکھایا اور ایک سال بعد کسی نے مشورہ دیا کہ ملتان میں  ویمن چیمبر آف کامرس اینڈ انڈسٹری کا قیام عمل میں لایا گیا ہے۔ ممبر شپ ملنے پراسے دیگر خواتین کے ساتھ مختلف قومی اور بین الاقوامی نمائشوں میں ساتھ لے کر جائیں گےاور کاروبار کو منافع بخش بنانے کی تربیت بھی دیں گے، بس ممبر شپ لی اور گروپ میں شامل ہوگئی۔اس گروپ میں یہ معلوم ہوجاتا تھا کہ کہاں کہاں نمائش لگنی ہے تو وہاں پہنچ جاتی تھی۔شہنازنے بتایاکہ اپنے کام کو منفرد اور جداگانہ بنانے کیلئے دستکاری کے ساتھ موتی کے کام میں الگ پہچان بنائی اور ایسی اشیاء تیار کیں ،جو بڑے گھروں کی خوبصورتی کو نمایاں کرتی تھیں۔ویمن چمبر آف کامرس اینڈ انڈسٹری کی ممبرشپ نے بہت فائدہ دیا میں جو خود کو ان پڑھ سمجھتی تھی آج نہ صرف اپنے خاندان کی معاشی حالت بہتر کیے ہیں بلکہ ای-کامرس کی وہ تربیت جو پڑھی لکھی خواتین بھی چھوڑ دیتی ہیں ،وہ مکمل کرکے اپنے کاروبار کو ترقی بھی دی ہے ۔اب یہ صورتحال  ہے کہ ٹیکنالوجی کے ذریعے خود آن لائن کام کرکے آرڈر لیتی ہوں جہاں ضرورت ہو شوہر کے ساتھ جاکر ڈلیوری دیتی ہوں ورنہ عموماً وہ بھی آن لائن ہوتی ہے۔

ویمن چیمبر آف کامرس کی ایگزیکٹوممبر فلزا ممتاز نے بتایا کہ اس وقت ویمن چیمبر آف کامرس ملتان  میں خواتین ممبران کی تعداد 342 ہے ،جن میں سے 50 ایسی خواتین ہیں جو آن لائن کاروبارسے وابستہ ہیں، ان میں  سے بیشتر ایسی خواتین ہیں جو پہلے گھروں میں بیٹھی تھیں اور کسی کاروباری یا صنعتکار گھرانے سےبھی تعلق نہیں رکھتی تھیں لیکن اپنے خاندان کا سہارا بننے اور خود کو معاشی طور پر مظبوط بنا کراپنی نئی نسل کے لئے ایک مثال بنی ہیں۔ اس حوالے سے چیمبر مزید خواتین کو جدید ٹیکنالوجی اور ای-مارکیٹنگ پر مختلف ٹریننگز کا بھی اہتمام کرتا رہتا ہے،تاکہ وہ گھر بیٹھے بآسانی اپنے کام کو فروغ دے سکیں۔انہی خواتین کے کام کوآگے بڑھا نے کے لئے ہر سال بلیوفیئر کا بھی انعقاد کیاجاتا ہے۔جس میں بہت سی معاشی و انتظامی مشکلات بھی درپیش رہتی ہیں،لیکن ان سب کو بھی خواتین مل کرحل کرتی ہیں۔

سابق صدر ویمن چمبر آف کامرس اینڈ انڈسٹری ملتان کی سی ای او فیمیٹک سیرت فاطمہ نے راقم الحروف سے  بات چیت کرتے ہوئے بتایا کہ آن لائن بزنس میں زیادہ تر لوگ کورونا وائرس کی وبا کے دوران منتقل ہوئے۔ اس وبا کے دوران معاشی مشکلات، بے روزگاری بڑھنے اور کئی کاروبارختم ہونے کی وجہ سے لوگوں اور خواتین کی جانب سے گھروں میں کام شروع کرنے پر انہوں نے بھی جدید دنیا سے ہم آہنگ ہونے اور خواتین کی آن لائن کاروبار میں حوصلہ افزائی کے لئے 2020ء میں انہوں نے خود کئی آن لائن کورس کئے اور2021ء میں فیمیٹک کو رجسٹر کرایا کیونکہ آن لائن کاروبار میں آپ کی انویسٹمنٹ بہت کم ہوتی ہے جو خواتین کیلئے بہترین موقع ہے۔خصوصاًسوشل میڈیا مارکیٹنگ  نہایت آسان ہے۔آرڈر آنے پر آپ چیز ایک سے اٹھا کر دوسرے کو ڈیلیور کر دیتے ہیں ،دوسرا ایسی خواتین جنہیں گھروں سے باہر نکلنے کی اجازت نہیں ہوتی ہے وہ گھر میں بیٹھ کر کما سکتی ہیں۔تاہم گھر میں بیٹھے ہوئے کام پر مکمل فوکس کرنا ایک چیلنچ ہوتا ہے ۔دوردراز کے علاقوں میں رسائی بہت مشکل ہوتی ہے کیونکہ کورئیر سروس وہاں موجود نہیں ہے،دوسرا ای- کامرس میں انٹر نیٹ کی رفتاربہترین چاہیئے ہوتی ہے جو ہمارے یہاں نہیں ہے۔سیرت فاطمہ نے بتایاکہ فیمیٹک کے پلیٹ فارم سے نوجوان بچیوں کو ای- کامرس کی تربیت فراہم کی جا رہی ہے ،تاکہ آنے والے دنوں میں وہ معاشی طورپر مظبوط ہوکر اپنے مستقبل کا فیصلہ خود کر سکیں۔

شہناز پروین حنیف  نے مزید بتایا کہ ٹیکنالوجی کا سوچ سمجھ کر اور مثبت استعمال خواتین کی زندگیوں کا رخ بدل دیتا ہے،وہ نہ صرف اپنا کاروبارچلاتی ہیں بلکہ غیر ملکی نمائشوں کیلئے اب اپلائی بھی خود کرتی ہے اور اپنے چیمبر کی ساتھیوں کے ساتھ سفر بھی کرتی ہیں،تاکہ زمانے کے بدلتے ڈھنگ دیکھ کر اپنے کام میں مزید بہتری لاسکیں۔ان نمائشوں میں اس کے کام کو ہاتھوں ہاتھ لیا جاتا ہے۔یہی وجہ ہے کہ چند سالوں سے نہ صرف وہ پاکستان کی معیشت میں حصہ ڈال رہی ہے بلکہ اپنے جیسی ہنرمند اور باصلاحیت 20 مزید خواتین کے گھروں کی خوشحالی اور چولہا جلانے کا سبب بھی ہے کہ کبھی اسے یقین ہی نہیں آتا کہ وہ یہ کام بھی کر رہی ہے۔اگر خواتین پر اعتماد کیا جائے تو وہ خاندانوں اور ملک کی قسمت بدل سکتی ہیں۔بدقسمتی سے پاکستان خصوصاً جنوبی پنجاب جیسے پسماندہ خطے میں یہ کم نظر آتا ہے۔مگر ایک وقت ایسا بھی آئے گا جب ای-کامرس میں خواتین ہی  چھائی ہوئی ہوں گی۔

آن لائن کاروبار میں حصہ ڈالنے والی خواتین اور ان کے ساتھ پس پردہ موجود ہنرمند خواتین کی مشکلات کے حوالے سے گفتگو کرتے ہوئےشہنازپروین حنیف نے بتایاکہ کام میں اکثر مشکلات درپیش ہوتی ہیں کیونکہ کبھی ہنرمند خاتون پر شوہر پابندی لگا دیتے ہیں تو کبھی والدین اور سسرال والے ان کے کام میں رکاوٹ پیدا کردیتے ہیں ،اس طرح کی دقت اکثر سامنے رہتی ہے کیونکہ ہمارے خطہ میں آج بھی خواتین کا گھر سے باہر نکل کر کام کرنا معیوب تصورکیاجاتا ہے۔گھر کے مرد چاہتے ہیں کہ عورتیں اپنی صلاحتیوں کا استعمال کرنے کی بجائے بس جو خود کما کر لائیں ،اسی پر گزارا کیا جائے ،یہ خواتین بچے پالیں ،ان کی خدمت کریں اور دو وقت کی روٹی کھائیں، زندگی بھر کیلئےبس یہی بہت ہے۔پھر میں ان کاریگر اور ہنر مند خواتین کو چھپ کرکام دیتی ہوں جو وہ اپنے گھروں میں بھی کرتی رہتی ہیں کیونکہ اب ہمارا کام بہت بڑھ گیا ہے اور کلائنٹ اعتماد بھی کرتے ہیں۔ہم بھی معاشرے کو پیغام دیتے ہیں کہ ہم کسی سے کم نہیں ہیں۔اس کام میں اب میرا پورا خاندان ساتھ دے رہا ہے۔ ہینڈمیڈ   کشن،بیگز،موتی والے کلچ،ٹیبل میٹ،ٹشو کور اور آرائشی اشیاء کی ڈیمانڈ بہت زیادہ بڑھ گئی ہے۔

پاکستان ٹیلی کمیونکیشن اتھارٹی کی سالانہ رپورٹ کے مطابق ملک میں موبائل صارفین کی تعداد 19 کروڑ تک پہنچ گئی ہے جس میں 14 کروڑ مرد جبکہ خوتین صرف 5کروڑ ہیں۔ اسی طرح موبائل فون پر انٹرنیٹ استعمال کرنے والوں کی تعداد 11 کروڑ ہے جس میں 9 کروڑ کے قریب مرد اور دو کروڑ 60 لاکھ سے زائد خواتین صارفین ہیں۔ پاکستان میں مختلف سوشل میڈیا پلیٹ فارمز پر ایکٹو سوشل میڈیا صارفین کی تعداد سات کروڑ ہے تاہم فیس بک، یوٹیوب، ٹک ٹاک اور انسٹا گرام پر مردوں اور عورتوں کے درمیان 47 سے 78 فیصد فرق پایا جاتا ہے۔  پاکستان میں عورتوں کے موبائل فون اور انٹرنیٹ کے استعمال میں اضافہ ہو رہا ہے، تاہم چھوٹے شہروں اور دیہی علاقوں میں یہ رجحان آج بھی انتہائی کم ہے۔ اس وقت پاکستان میں 5 کروڑ 20 لاکھ موبائل سمز خواتین کے بائیو میٹرک کی تصدیق کے ساتھ حاصل کی گئی ہیں۔ جن میں سے 50 فیصد یعنی دو کروڑ 60 لاکھ تھری-جی یا فور جی انٹرنیٹ بھی استعمال کر رہی ہیں۔اعدادوشمار کے مطابق دنیا بھر میں مردوں اور عورتوں کے درمیان موبائل انٹرنیٹ کے استعمال کا فرق 16 فیصد تک ہے۔ یعنی انٹرنیٹ استعمال کرنے والوں میں عورتوں کے مقابلے انٹرنیٹ استعمال کرنے والے مردوں کی تعداد 16 فیصد زائد ہے جبکہ پاکستان میں یہ شرح 38 فیصد ہے۔پاکستان میں چار بڑے سوشل میڈیا پلیٹ فارمز پر موجود سوشل میڈیا صارفین کی تعداد 16 کروڑ سے زائد بنتی ہے تاہم ایک صارف بیک وقت دو سے تین پلیٹ فارمز پر بھی موجود ہے۔ یوٹیوب کے سب سے زیادہ صارفین ہیں جن کی تعداد 7 کروڑ 17 لاکھ ہے۔ جن میں سے 72 فیصد مرد جبکہ 28 فیصد خواتین ہیں۔ یہ فرق 61 فیصد بنتا ہے۔ فیس بک کے صارفین کی تعداد پانچ کروڑ 71 لاکھ ہے جن میں سے 77 فیصد مرد اور جبکہ 23 فیصد خواتین ہیں۔ یہ فرق 70 فیصد تک بتایا جاتا ہے۔ ٹک ٹاک کے صارفین کی تعداد ایک کروڑ 83 لاکھ سے زائد ہے جن میں سے 82 فیصد مرد اور 18 فیصد خواتین ہیں۔ یہ فرق 78 فیصد بنتا ہے۔ انسٹا گرام پر صارفین کی تعداد میں سب سے کم فرق ہے جو کہ 47 فیصد ہے۔ انسٹا گرام کے پاکستانی صارفین کی تعداد ایک کروڑ 38 لاکھ ہے جس میں سے65 فیصد مرد اور 35 فیصد خواتین۔

موبائل انٹرنیٹ آنے سے دنیا بھر میں برانچ لیس بینکنگ کا رجحان فروغ پا رہا ہے اور پاکستان میں بھی برانچ لیس بینکنگ میں آئے روز اضافہ ہو رہا ہے لیکن گزشتہ چار سال کے دوران موبائل کے ذریعے برانچ لیس بینکنگ کے حوالے سے مردوں اور عورتوں کے اکاونٹس میں فرق میں صرف 10 فیصد کمی واقع ہوئی ہے۔ چار سال پہلے کل چار کروڑ 60 لاکھ اکاؤنٹس تھے جن میں سے 3 کروڑ 60 لاکھ مردوں جبکہ عورتوں کے اکاؤنٹس ایک کروڑ تک تھے۔ اب یہ تعداد بڑھ کر 8 کروڑ 85 لاکھ ہو چکی ہے جن میں سے 6 کروڑ 37 لاکھ مردوں کے جبکہ دو کروڑ 48 لاکھ خواتین کےہیں۔

سائبر کرائم قوانین کےماہرایڈووکیٹ محمد ارسلان کے مطابق ملک میں قانون سازی کے باوجود خواتین کے خلاف جرائم بہت زیادہ بڑھ چکے ہیں،بالخصوص سائبرجرائم نے خواتین کا جینا حرام کر رکھاہے۔آن لائن کاروبارکرنے والی خواتین کو بہت زیادہ تنگ کیاجاتاہے،انہیں آرڈر دے کر پھر وصول کرنے سے انکار کرکے پریشان کرنے کے ساتھ معاشی طور پر نقصان پہنچایاجاتاہےیا پھر غیر اخلاقی میسجز کیے جاتے ہیں،جس سے یہ خواتین پریشانی کاشکار رہتی ہیں،لیکن معاشرتی اور خاندانی دباؤکے باوجود آن لائن کام جاری رکھنے کے غرض سے وہ یہ شکایت بھی نہیں رکھتی ہیں اور مجرم شہہ پاتے ہیں،اگر خواتین قانونی کارروائی کرنے کا ٹھان کر آجائیں توطویل عدالتی کارروائی اورقانونی موشگافیوں سےگھبرا کر اپنی شکایات ہی واپس لے لیتی ہیں۔

سپیشل عدالت سنٹرل (ملتان)جس کا دائرہ کارتقریباًجنوبی پنجاب ہے اور ایف آئی اے میں درج مقدمات کی سماعت بھی اسی عدالت میں کی جاتی ہےکے اعدادوشمار کے مطابق رواں سال کے پہلے 6ماہ میں خواتین کی جانب سے سائبر جرائم کی 130 شکایات درج کرائی گئیں ، جن میں سے 57 مقدمات کے چالان مکمل کرکے سپیشل عدالت بھجوائے گئےجہاں یہ مقدمات ابتدائی سطح پر ہیں،اس کے علاوہ پہلے سے 387 مقدمات بھی زیرالتواء ہیں ،جو کم و بیش ایک سے 3 سال پرانے ہیں۔

آن لائن بیکری چلانے والی خاتون سارہ دانش کے مطابق اس نے کبھی نہیں سوچا تھا کہ  کوئی کام کرے گی کیونکہ ماسٹرز کرنے کے بعد شادی ہوگئی اور سسرال و بچوں کے جھمیلوں میں دنیا کا ہوش ہی نہیں تھا۔بعد ازاں میرے شوہر جو فارما سوٹیکل شعبہ میں کام کرتے تھے ،وہ بیروزگار ہوئے تو اپنی دکان کھول لی، تاہم انہی دنوں میں کورونا وبا اور لاک ڈاؤن کا آغاز ہوا،اب دکان کا کرایہ تو دینا ہی تھا۔ سب سے پہلے شوق میں ایک کیک بنایا اور ایک فوڈ گروپ میں لگا دیا۔ جس پر میرا شوہر بھی ناراض ہوا کہ اپنا موبائل نمبر پبلک کیوں کیا، لیکن  جب آرڈر ملنے شروع ہوئے تو اس نے بھی ساتھ دیا ۔تاہم اپنے ہی رشتوں سےپہلے تنقید شروع ہو گئی اور کام بند کرنے کے لئے سسرالی ومیکے کے رشتوں کو مجبورکیا گیا لیکن اس نے کام بندکرنے سے انکار کیا جبکہ شوہر بھی اس کی لگن اور محنت دیکھ کر کامیاب ہونے کے امکان کے پیش نظرخاموش رہا،پر جب یہ سننے کو ملتا تھا کہ بیچاری کام کر رہی، حالات کی خرابی نے مجبور کردیا ہے تو دکھ بھی ہوتا ہے۔عورت اگر مشکل میں شوہر اور گھر کا سہارا بنے تو معیوب نہیں ہے ۔ایسی حوصلہ شکنی ذہنی طور پر پریشان رکھتی ہے۔آج اس کے بنائے ہوئے کیک،پیسڑیز اور دیگر اشیاء کی ڈیمانڈ اس قدر ہے کہ وہ اپنے ساتھ اور ہنرمند خواتین کا اضافہ کرنے کا سوچ رہی ہیں۔

آل پاکستان ویمن ایسوسی ایشن(اپواء)کی جنرل سیکرٹری نازیہ خان کاکہنا ہے کہ دیہاتوں میں موجود ہنرمند خواتین آن لائن کاروبارکے منافع کی اصل حقدار ہیں،جن کی کمائی سے خریدے گئے اینڈرائیڈ موبائل فون گھر کے مردوں کو تو رکھنے کی اجازت ہے لیکن ان خواتین کی انٹرنیٹ تک رسائی گناہ سمجھی جاتی ہے۔ اس لئے یہ ہنرمند خواتین اپنے حق سے محروم رہتی ہیں اور انہیں کمائی کا اصل حصہ نہیں ملتا ہےاور نہ ہی ان کو ان کی محنت کاپورا صلہ ملتاہے ۔ اس لئے ایسی خواتین کے لئے ان کی تنظیم کام کررہی ہے اور تربیت کے ساتھ مواقع بھی فراہم کررہی ہے۔

اگر پاکستان جیسے ترقی پزیر اور خواتین کے لئے مشکل حالات رکھنے والے ملک میں شہناز کی طرح خواتین حوصلے اور جرآت کے ساتھ مشکلات کا مقابلہ کر سکتی ہیں اور اپنے آپ کو مضبوط بنانے کے ساتھ ملکی معیشت کی بہتری میں اپنا کردار ادا کر سکتی ہیں تو سینکڑوں ایسی خواتین مل کر معیشت کی بہتری کے لئے مثال بننے کو تیار ہیں لیکن ضرورت اس امر کی ہے کہ ایسی خواتین کو معاشرے کی سوچ میں تبدیلی کے لئے مثال بنایا جائے۔ جس کے لئے انہیں آسان اقساط پر بلاسود قرضے فراہم کئے جائیں اور انہیں کاروبار کرنے کے لئے تربیت دینے کے ساتھ بیرون ممالک ان کی بنائی اشیاء فروخت کرنے کے لئے بھی اقدامات کئے جائیں،جدید ٹیکنالوجی تک رسائی ممکن بنائی جائے تو شاید اس ملک کی ہر خاتون جو کوئی نہ کوئی ہنر ضرور رکھتی ہے، صرف تربیت اور جدید ٹیکنالوجی سے استفادہ حاصل کرنے کےمواقع فراہم ہونے سے نہ صرف اپنی اور اپنے خاندان کی بلکہ ملک کی تقدیر بدل سکتی ہے اور اس ملک کی معیشت کو مضبوط کرنے کے لئے اپنا بھرپور کردار بھی نبھا سکتی ہے۔

خالدہ نیاز

'جس جگہ میری شادی ہوئی ہے یہاں نوکری کے مواقع نہ ہونے کے برابر ہیں۔ صرف پرائیویٹ سکولز ہیں لیکن اس میں اساتذہ کو زیادہ سے زیادہ دس ہزار روپے تک تنخواہ ملتی ہے اور اتنے پیسوں میں آجکل گزارہ نہیں ہوتا اس وجہ سے میں نے انٹرنیٹ کی مدد سے آن لائن کام کرنا شروع کردیا اور آج میں آن لائن پلیٹ فارمز سے اچھے خاصے پیسے کماتی ہوں'

یہ کہنا ہے 34 سالہ ثمر سید کا جن کی 8 سال قبل خیبرپختونخوا کے ضلع صوابی میں شادی ہوئی۔ ثمر سید کا ایک بیٹا بھی ہے اور آجکل وہ آن لائن پلیٹ فارمز اپ ورک فائیور کے ذریعے ورچول اسسٹنٹ کے حیثیت سے کام کررہی ہیں۔

ثمر سید کا کہنا ہے کہ شروع میں انکا اس میں کوئی تجربہ نہیں تھا تاہم وہ چھوٹے موٹے کام کرلیتی تھی اور جلد ہی انکو اس بات کا احساس ہوگیا کہ پاکستان میں ایک لیکچرار جتنا کماتا ہے، ورچول اسسٹنٹ اس سے کہیں زیادہ آن لائن کام کرکے کما سکتا ہے۔ ان کا کہنا ہے کہ وقت کے ساتھ ساتھ انکو تجربہ حاصل ہوا اور جن پلیٹ فارمز پہ وہ کام کررہی ہیں اس میں انکا ایک اچھا پروفائل بن گیا ہے۔

ایک مہینے میں قریباً 3 لاکھ تک کمائی کی ہے

انہوں نے کہا کہ انکا زیادہ کام اپ ورک پر موجود ہے اور انکو زیادہ کام بھی اسی پلیٹ فارم کے ذریعے ملا ہے۔ ثمر سید نے بتایا کہ اپ ورک کے ذریعے انہوں نے ایک مہینے میں قریباً 3 لاکھ تک کمائی کی ہے جبکہ اس پر کام کرنے سے پہلے انکے پاس کچھ بھی نہیں تھا۔

ایک سوال کے جواب میں ثمر سید نے کہا کہ فری لانسنگ سے پہلے ان کے لیے معاشی مسائل بہت زیادہ تھے کیونکہ مہنگائی بہت زیادہ ہے اور انکے پاس کوئی کام نہیں تھا تو پیسے کہاں سے آتے جبکہ انکا کوئی بھائی نہیں ہے تو والدین کی ذمہ داری بھی ان پر اور انکی دوسری بہن پر ہے لیکن انکی دوسری بہن کی تنخواہ بھی کم تھی۔

ثمر سید کا کہنا ہے کہ وقت گزرنے کے ساتھ انہوں نے اپ ورک کے ذریعے اتنی کمائی کرلی کہ انہوں نے نہ صرف اپنے لیے گاڑی لی ہے بلکہ ایک پلاٹ بھی لے لیا ہے اور انکے ساتھ انکی بہن نے بھی فری لانسنگ شروع کردی ہے۔

فری لانسنگ اور خواتین کی معاشی خودمختاری

ثمر سید نے کہا کہ فری لانسنگ کے ذریعے انکو معاشی خودمختاری مل گئی ہے اور انکے کافی سارے معاشی مسائل حل ہوگئے ہیں۔ ان کا کہنا تھا کہ وقت گزرنے کے ساتھ انکو احساس ہوا کہ گرافک ڈیزائننگ بھی سیکھ لینی چاہئے لہذا اب وہ یہ بھی سیکھ رہی ہیں تاکہ انکے پاس زیادہ سے زیادہ سکلز ہو اور زیادہ کمائی کرسکیں۔ ان کا کہنا ہے کہ گرافک ڈیزائننگ ایک گلوبل ہنر ہے اگر کسی کے پاس یہ ہنر ہے تو ان کو آسانی سے دنیا میں کہیں بھی نوکری مل سکتی ہے۔

ثمر سید اس بات پر زور دیتی ہیں کہ ہماری لڑکیوں کو جدید ٹیکنالوجی سے متعلق سکلز سیکھنے چاہیئیں کیونکہ یہ انکے لیے بہت ضروری ہے اور زندگی میں انکے بہت کام آسکتے ہیں۔ مثال کے طور پر اگر ایک لڑکی کی شادی ہوجاتی ہے پھر اس کو گھر سے باہر کام کرنے کی اجازت نہیں ملتی یا کسی اور وجہ سے وہ نوکری پہ نہیں جاسکتی تو ایسے میں کمپیوٹر سے متعلق سکلز اور تربیت کے ذریعے وہ گھر بیٹھے لاکھوں کماسکتی ہیں۔

آن لائن کام کرنے کے لیے کونسے سکلز ضروری ہیں ؟

ثمر سید کا کہنا ہے کہ جو بھی لڑکیاں آن لائن کام کرنا چاہتی ہیں ان کو مائیکروسافٹ ورڈ، ایکسل، ریرسرچ سکلز اور کمیونکیشن سکلز آنے چاہئے اور انکی انگلش بھی اچھی ہونی چاہیے کیونکہ آن لائن میں زیادہ تر باہر ممالک کے کلائنٹس ہوتے ہیں تو ایسے میں انگلش ضروری ہوجاتی ہے۔

ثمر سید کا کہنا ہے کہ آن لائن کام کے لیے سٹیبل انٹرنیٹ کا ہونا بے حد ضروری ہے کیونکہ اگر انٹرنیٹ صحیح نہیں ہوگا تو ایسے میں کام وقت پر نہیں ہوپائے گا اور کام کرنے والے اور کروانے والے دونوں کو مشکلات درپیش ہونگی۔

ثمر سید کی طرح نوشہرہ سے تعلق رکھنے والی لیلیٰ بھی آن لائن کام کرتی ہیں اور پیسے کماتی ہیں۔ لیلیٰ نے ایک پرائیویٹ یونیورسٹی سے سافٹ ویئر انجنیئرنگ میں بی-ایس کیا ہے۔ لیلیٰ کا کہنا ہے کہ انہوں نے یونیورسٹی سے ہی فری لانسنگ شروع کردی تھی، فیس بک پہ انکو کلائنٹس ملتے تھے جن کے لیے وہ گرافک ڈیزائننگ کا کام کرتی تھی۔ بی-ایس مکمل کرنے کے بعد انہوں نے پشاور کی ایک پرائیویٹ کمپنی میں گرافک ڈیزائنر کے حیثیت سے کام کرنا شروع کیا اور وہاں ایمازون بھی سیکھنے لگیں۔ لیلیٰ کہتی ہیں کہ یونیورسٹی میں اساتذہ کے لیے بھی گرافک ڈیزائننگ کا کام کیا کرتی تھی۔

  لیلیٰ کا بیس ہزار میں گزارہ مشکل ہوگیا تھا

ان کا کہنا ہے کہ کچھ ہی مہینوں میں انہوں نے ایمازون کا کام سیکھ لیا تو انہوں نے ورچول اسسٹنٹ کے طورپر بھی کام کرنا شروع کیا۔ 'جہاں میں کام کررہی تھی وہاں مجھے بیس ہزار روپے ماہانہ مل رہے تھے جس میں میرا گزارہ کرنا مشکل ہوگیا تھا تو وجہ سے میں نے وہ نوکری چھوڑ دی کیونکہ میں نے سوچا جتنا میں مہینے میں کماتی ہوں اس سے زیادہ تو گھر بیٹھے فری لانسنگ میں کمالوں گی' لیلیٰ نے بتایا-

ان کا کہنا ہے کہ اس کے بعد انہوں نے گھر سے آن لائن کام کرنا شروع کردیا۔ سب سے پہلے مجھے ایک کلائنٹ ملا جس کو میں نے ایمازون سیکھایا۔ اس کے بعد میں نے اپ ورک، فائیور اور باقی آن لائن پلیٹ فارمز پہ اکاونٹ بنایا جس کے بعد مجھے اچھی جگہ آن لائن نوکری مل گئی اب میں مہینے میں اچھے خاصے پیسے کمالیتی ہوں جس سے گھر کی ضروریات پوری ہوجاتی ہے اور کام کا بوجھ بھی اتنا نہیں ہوتا۔

لیلیٰ کا کہنا ہے کہ آن لائن اکاونٹ بنانے سے لوگ کام دینا شروع کردیتے ہیں پھر مقررہ وقت میں انکو وہ کام دینا ہوتا ہے جب کام مکمل ہوجائے تو لوگ پیمنٹ کے ساتھ ریویو بھی دیتے ہیں اور اس ریویو کو دیکھ کے اور لوگ بھی کام دینا شروع کردیتے ہیں اور اس طرح ایک سلسلہ چل پڑتا ہے۔

ان کا ماننا ہے کہ آن لائن طریقے سے لڑکیاں گھر بیٹھے زیادہ پیسے کماسکتی ہیں بنسبت کسی دفتر میں کام کرنے کے۔

ایماوزن کہاں سے سیکھ سکتے ہیں

لیلیٰ کا کہنا ہے کہ پاکستان میں ایمازون سیکھنے کے خواہش مند افراد کو چاہئے کہ وہ یوٹیوب پرجاکر بیسکس سیکھے اس کے بعد اینیبلرز، ایکسٹریم کاماز، بی ونرز اور باقی ایسے ادارے ہیں جہاں لوگ جاکر آسانی سے ایمازون سیکھ سکتے ہیں اور اس کے بعد اس سے کما بھی سکتے ہیں۔

لیلیٰ کہتی ہیں کہ ایمازون میں پریکٹیکل کام بھی ضروری ہوتا ہے جو کسی ادارے میں جاکر بندہ سیکھ سکتا ہے۔ لیلیٰ کے مطابق ایماوزن میں پہلے پروڈکٹ سرچنگ کے حوالے سے سیکھایا جاتا ہے اس کے بعد سورسنگ کے حوالے سے تربیت دی جاتی ہے ، اس کے بعد رینکنگ کا نمبر آجاتا ہے اور پھر لانچنگ کرتے ہیں۔

لیلیٰ کا کہنا ہے کہ لڑکیوں کے لیے ایمازون میں بہت پوٹینشل موجود ہے، اگر یہ سیکھ جائیں تو انکو صرف لیپ ٹاپ اور انٹرنیٹ کی ضرورت ہوتی ہے جس کے بعد وہ گھر میں بیٹھ کر اچھا خاصہ کماسکتی ہیں۔

نمیرہ حیات ٹوڈی اینیمیشن ماسٹر

پشاور کی نمیرہ حیات بھی ان چند لڑکیوں میں سے ایک ہے جو آن لائن ذریعے سے پیسے کما رہی ہیں۔ نمیرہ پشاور یونیورسٹی سے جرنلزم پڑھ رہی ہیں اور انکی عمر 23 سال ہے۔ نمیرہ پچھلے 4 سال سے فائیور پہ کام کررہی ہیں۔ نمیرہ ٹو ڈی اینیمیشن ویڈیوز بناتی ہیں جس طرح کہ کارٹونز، پروموشنل ویڈیوز وغیرہ۔

نمیرہ کا کہنا ہے انکو فائیور پہ انکے سکل کے حساب سے آڈر ملتے ہیں اور پھر وہ مقررہ وقت میں کلائنٹ کو کام کرکے دیتی ہیں۔

نمیرہ کا کہنا ہے کہ انکو گھنٹوں کے حساب سے نہیں بلکہ آڈر کے حساب سے کام ملتا ہے مثال کے طورپر ایک آرڈر کے لیے انکو ایک ہفتہ ملتا ہے تو دوسرے کے لیے ایک مہینہ اور اس طرح انکو پیسے بھی آرڈر کے حساب سے ملتے ہیں۔

لیلیٰ اور ثمر کی طرح نمیرہ بھی فائیور کے ذریعے اچھے پیسے کما رہی ہے۔ ان کا کہنا ہے کہ جب کوئی نیا فائیور کو جوائن کرتا ہے تو یکدم اس کو نہ تو پیسے ملیں گے نہ آرڈر اس کو شروع میں وقت دینا پڑے گا اور محنت کرنی ہوگی اس کے بعد اس کو کام ملنا شروع ہوجاتا ہے۔ نمیرہ کا کہنا ہے کہ جب ایک مرتبہ پروفائل بن جاتا ہے تو ایک بندہ مہینے میں اسی ہزار یا اس سے زیادہ بھی کماسکتا ہے۔

ایک منٹ ویڈیو کے ساٹھ ڈالرز ملتے ہیں

ان کا کہنا ہے کہ انکو ایک منٹ ویڈیو کے ساٹھ ڈالرز ملتے ہیں لیکن یہ سکل پہ منحصر کرتا ہے جس کی جتنی سکلز ہونگی اس حساب وہ وہ کماسکتا ہے۔ نمیرہ کا کہنا ہے کہ یہ لڑکیوں کے لیے ایک محفوظ اور بہتر آپشن ہے کیونکہ ہمارے معاشرے میں خواتین کے لیے باہر کا ماحول محفوظ نہیں تصور کیا جاتا، بعض خاندان بھی لڑکیوں کو باہر کام کرنے کی اجازت نہیں دیتے تو یہ ان خواتین کے لیے بہت ہی زبردست آپشن ہے کہ وہ گھر بیٹھے آن لائن ذریعے سے پیسے کمائیں۔

ان کا کہنا ہے کہ آن لائن کام کرنے سے لڑکیاں گھر والوں کو بھی وقت دے سکتی ہیں اور کام کو بھی وقت دے سکتی ہیں۔

انٹرنیٹ بندش کی وجہ سے نمیرہ کو مشکلات کا سامنا رہا

نمیرہ کہتی ہیں پچھلے دنوں میں جب ملک میں انٹرنیٹ بند ہوگیا تھا تو انکو بہت مشکلات درپیش آئی کیونکہ انکو مقررہ وقت میں کام ڈیلیور کرنا ہوتا ہے لیکن جب انٹرنیٹ نہیں تھا تو کام کیسے کرتی۔ ان کا کہنا ہے کہ جتنے بھی لوگ آن لائن  کام کرتے ہیں انکو اس انٹرنیٹ کی بندش کی وجہ سے بہت دقت اٹھانا پڑی۔

نمیرہ کا کہنا ہے کہ ملک میں انٹرنیٹ بندش کی وجہ سے ان سمیت فائیور پر کام کرنے والی ساتھیوں کے زیادہ تر آڈرز کینسل ہوگئے کیونکہ مقررہ وقت پہ کام نہ کرسکے۔ ان کا کہنا ہے کہ کام کردیا تھا لیکن اس کو ڈیلیور نہ کرسکے ایک تو انکی محنت ضائع ہوگئی، ریویوز بھی خراب ہوگئے اور پیسے بھی گئے۔

انٹرنیٹ کی اہمیت کے حوالے سے بات کرتے ہوئے نمیرہ نے بتایا کہ اگر اسی طرح بار بار انٹرنیٹ بند ہوتا رہا تو فری لانسرز کے لیے بہت مشکل ہوجائے گا۔ نمیرہ کا کہنا ہے کہ انٹرنیٹ بندش مشکلات کے باوجود آجکل کے دور میں فری لانسنگ ہی بہترین آپشن ہے۔

آن لائن کام کرنا بہت آسان ہوچکا ہے

پشاور سے تعلق رکھنے والے سوفٹ ویئر انجنیئر اور ویب ڈیویلپر صوفی علی کا کہنا ہے کہ آجکل کے دور میں آن لائن کام کرنا بہت آسان ہوچکا ہے۔ ان کا کہنا ہے کہ کرونا وائرس نے ہمیں سکھادیا ہے کہ ہم گھر سے آن لائن کس طرح کام کرسکتے ہیں، کرونا وائرس نے دنیا کو سوچنے کا ایک نیا نظریہ دے دیا ہے۔ صوفی علی سمجھتے ہیں کہ آن لائن کام کرنا اگر ایک طرف آسان ہے تو دوسری جانب اس کے فائدے بھی ہے۔ مثال کے طور پر ایمپلائر کو ایک مکمل سیٹ اپ کی ضرورت نہیں ہوگی، فرنیچر اور بجلی کا خرچہ نہیں ہوگا۔ اس کے علاوہ کام کرنے والوں کو بھی فائدہ ہے ایک تو انکو ٹرانسپورٹ کی ضرورت نہیں ہوگی دوسرا وہ گھر بیٹھے کسی بھی وقت کام کرسکتے ہیں اور نیند بھی پوری سکتے ہیں، ساتھ میں گھر کا کام بھی کرسکتے ہیں۔

صوفی علی کا کہنا ہے کہ آن لائن کام نے خواتین کے لیے پیسے کمانا بہت آسان کردیا ہے کیونکہ اس میں صرف ایک لیپ ٹاپ اور انٹرنیٹ کی ضرورت ہوتی ہے۔ بس کچھ سکلز سیکھنے کے بعد خواتین اس قابل ہوجاتی ہیں کہ وہ اچھے خاصے پیسے کمانے لگتی ہیں۔

صوفی علی کہتے ہیں کہ اگر آن لائن تین چار کلائنٹس مل جائیں تو پھر اس سے زیادہ کی ضرورت نہیں ہوتی کیونکہ ان کی انہی کلائنٹس سے اچھی خاصی کمائی ہوجاتی ہیں۔ ان کا کہنا ہے کہ آنیوالا دور آن لائن کام کا ہے اور اس میں مواقعے بھی زیادہ ہیں لہذا خواتین کو سکلز حاصل کر کے اس جانب توجہ دینی چاہئے